70 andlit fyrir 70 ár - Arnar Sveinn Geirsson
Arnar Sveinn Geirsson, formaður Leikmannasambands Íslands og fótboltamaður, situr í stjórn Krafts. Hann á sér sögu með krabbameinum eins og við flest. Hann missti móður sína aðeins 12 ára gamall.
Arnar Sveinn Geirsson er fæddur árið 1991, alinn upp í Hlíðunum og varð snemma þekktur fótboltamaður í uppeldisfélagi sínu í Val. Þar naut hann mikillar velgengni og hefur fagnað bæði bikar-og Íslandsmeistaratitlum að Hlíðarenda. Arnar hefur einnig vakið athygli sem talsmaður fótboltamanna á Íslandi sem formaður Leikmannasambands Íslands og nú nýlega sem sérfræðingur eða „pundit“ á Evrópumóti karla sem fram fór um alla Evrópu í sumar.
Arnar, eins og við flest, á sér sögu með krabbameinum. Hann missti móður sína þegar hann var aðeins 12 ára gamall. Hann glímdi við erfiðar tilfinningar vegna þess lengi vel, fannst eitthvað vanta. Í dag hefur hann unnið mikið í sinni sorg og lifir með henni og minningu móður sinnar. Hann lætur líka af sér kveða á vettvangi Krafts, stuðningsfélagi ungs fólks sem hefur greinst með krabbamein og aðstandendur, en þar situr Arnar í stjórn.
„Ég hafði markvisst forðast Kraft í meira en 15 ár - þrátt fyrir þó að fylgjast með í laumi - áður en ég settist í stjórn félagsins. Ástæðan var sú að ég var logandi hræddur við krabbamein. Mamma dó úr krabbameini árið 2003, þegar ég var 12 ára gamall, og ég hélt að besta leiðin væri að setja hausinn undir mig og keyra áfram. Á endanum gat ég ekki meira - lenti á vegg sem ég gat ekki brotið niður - og fór loksins að vinna í öllum tilfinningunum undir niðri sem voru í einum stórum hnút. Í kjölfarið sá ég að fullt af fólki var og er í sömu sporum og ég og því fannst mér það liggja beinast við að gefa af mér og reyna að koma einhverju af því sem ég hef lært til annarra. Ekki reyna að gera þetta ein - það er bæði erfiðara og svo miklu leiðinlegra!“
Arnar Sveinn Geirsson er eitt af 70 andlitum Krabbameinsfélagsins á afmælisárinu 2021. Við ætlum að birta 70 myndir eða myndskeið af fólki sem hefur komið við sögu í baráttunni gegn krabbameinum í 70 ára sögu félagsins. Krabbameinsfélagið er rekið fyrir sjálfsaflafé með stuðningi frá íslenskum almenningi og fyrirtækjum. Við hvetjum fólk til að fylgjast með á instagram og facebook, myllumerkið er #70andlit
