70 andlit fyrir 70 ár - Víðir Reynisson
Víðir Reynisson hefur verið nánasti aðstandandi krabbameinsgreindra og það oftar en einu sinni. Hann minnir á að samstaðan skiptir mestu máli í glímunni við krabbamein, þar gegnir Krabbameinsfélagið lykilhlutverki.
Hinn hógværi og hægláti Víðir Reynisson hefur uppskorið mikla og verðskuldaða virðingu íslensku þjóðarinnar. Hann hefur verið til þjónustu reiðubúinn í gegnum þykkt og þunnt á tímum heimsfaraldurs og staðið sig framúrskarandi vel. Krabbamein hefur komið við sögu í lífi Víðis, rétt eins og hjá langflestum ef ekki öllum Íslendingum.
Víðir er fæddur í Vestmannaeyjum en fluttist upp á land 11 ára að aldri. Hann segir frá því að þar átti hann fimm æskufélaga sem héldu saman fram á fullorðinsár. Tveir þeirra eru fallnir frá, þar af einn aðeins 28 ára. Þeir létust vegna krabbameina. Móðir Víðis greindist einnig með krabbamein, fór í gegnum meðferð og sigraðist á sjúkdómnum.
Víðir minnir okkur á að staðan er mun betri núna gagnvart krabbameinum en fyrir 70 árum, 50 árum, já og jafnvel 20 árum. En það er með tilveru félaga eins og Krabbameinsfélagsins sem stöðugar framfarir verða í að kljást við þennan vágest. Að takast á við hann er langhlaup – og eins og við höfum svo oft heyrt áður og Víðir segir svo réttilega: „Við getum þetta saman.“
Víðir Reynisson er eitt af 70 andlitum Krabbameinsfélagsins á afmælisárinu 2021. Við ætlum að birta 70 myndir eða myndskeið af fólki sem hefur komið við sögu í baráttunni gegn krabbameinum í 70 ára sögu félagsins. Krabbameinsfélagið er rekið fyrir sjálfsaflafé með stuðningi frá íslenskum almenningi og fyrirtækjum. Við hvetjum fólk til að fylgjast með á instagram og facebook, myllumerkið er #70andlit
