70 andlit fyrir 70 ár - Hildur Baldursdóttir
Hildur Baldursdóttir er bókasafnsfræðingur, gift og móðir fjögurra dætra og á sjö barnabörn. Þó að vinir vilji hjálpa þá þekkja þau þetta ekki. Það er miklu betra að skemmta sér með vinunum en tala við Krabbameinsfélagið um hvað er að angra mann.
Hildur segir að þegar hún greindist hafi lífið verið voðalega skemmtilegt og hún hafi upplifað að hún hefði verið að leika sér á leikvelli lífsins þegar skyndilega var tekið í hálsmálið á sér og henni og fjölskyldu hennar verið hent ofan í dimman skurð. Og þau vissu ekkert hvað þau ættu að gera. En smám saman byrjuðu ljósin að loga.
Krabbameinsfélagið og vinirnir allir komu og hjálpuðu þeim að fara í gegnum þetta. Og það þarf mikla hjálp. Hún hefur hitt fólk sem ætlar að fara þetta á hnefanum, en hún hafi engan séð sem hefur gengið það vel, því þetta er alveg nýtt líf. Við vorum stundum að líkja þessu við að þetta væri eins og að flytja í nýtt land þegar maður þarf að finna út hvar þessi skrifstofa er, hvað þýðir þetta, hvar kaupir maður svona. Og þá er hjálpin algjörlega ómetanleg.
https://www.youtube.com/watch?v=CfouFM0obhk
Hildur Baldursdóttir er eitt af 70 andlitum Krabbameinsfélagsins á afmælisárinu 2021. Við ætlum að birta 70 myndir eða myndskeið af fólki sem hefur komið við sögu í baráttunni gegn krabbameinum í 70 ára sögu félagsins. Við hvetjum fólk til að fylgjast með á instagram og facebook, myllumerkið er #70andlit
