Aðstandendur
Það er áfall fyrir flesta þegar einhver nákominn greinist með krabbamein.
Fjölskylda og vinir ganga oft í gegnum erfiða og flókna tíma í kjölfar krabbameinsgreiningar hjá ástvini sínum. Þeir taka þá gjarnan á sig aukna ábyrgð og skyldur en setja sínar eigin þarfir til hliðar. Það getur reynst flókið að huga að þörfum þess nákomna sem greinst hefur með krabbamein á sama tíma og þú ert að takast á við alls konar tilfinningar og breytingar í lífinu. Það er mikilvægt að gefa sér leyfi og finna rými til að huga að eigin líðan þótt það geti reynst flókið fyrir marga á köflum.
Upplifun aðstandenda
Hér má lesa um ýmislegt sem algengt er að aðstandendur upplifa og ráð til að takast á við lífið í breyttum aðstæðum.
Að vera aðstandandi er ótrúlega krefjandi en ekki síður mikilvægt. Einn daginn ertu tengiliður við fjölskyldu og vini. Annan daginn þarftu að vera í þögninni og vera koddinn sem hægt er að kúra upp að og vera til staðar.
Það er því mikilvægt að hlúa að sér því þú hjálpar ekki mikið ef þú ert á vondum stað.
- Magnús Viðar Heimisson
Nokkur ráð til aðstandenda
Þegar álagið er mikið hættir aðstandendum til að vanrækja sig.
Krabbameinsfélagið býður upp á fræðslu, ráðgjöf og stuðning við aðstandendur, hvort sem ástvinur er nýgreindur með krabbamein eða er með langvinnan sjúkdóm.
Þjónusta af ýmsum toga, meðal annars:
- Hjálp við að takast á við erfiðar hugsanir og tilfinningar
- Upplýsingar um réttindi í veikindunum
- Upplýsingar um líkamleg og sálræn einkenni sem eðlilegt er að upplifa
- Fræðsla um úrræði og þjónustu sem gæti gagnast
- Ráðgjöf um hvernig best er að tala við börn um krabbamein
- Ráðgjöf um samskipti við aðra varðandi veikindin
Hér má lesa nánar um ráðgjöf Krabbameinsfélagsins
Aðstandendur geta einnig leitað stuðnings hjá eftirfarandi:
Ráðgjöf og stuðningur þér að kostnaðarlausu
Þjónusta félagsráðgjafa, hjúkrunarfræðinga og sálfræðinga Krabbameinsfélagsins er í boði í greiningarferli, meðferð eða að lokinni meðferð, á íslensku, ensku og pólsku. Þjónustan er líka fyrir aðstandendur.