Jafningjastuðningur
Það getur verið hjálplegt að ræða við einhvern sem hefur gengið í gegnum svipaða reynslu og þú ert að ganga í gegnum, einhvern sem hefur þann skilning sem einungis fæst með því að upplifa hlutina sjálfur.
Heilbrigðisstarfsfólk getur gefið nýgreindum krabbameinssjúklingi og aðstandendum ýmsar upplýsingar um krabbamein og meðferðir. En stundum er gott að geta talað við einhvern sem hefur gengið í gegnum það sama og maður stendur frammi fyrir.
Fyrir utan stuðninginn sem felst í því að ræða við einhvern sem er búinn að ganga í gegnum það sem einstaklingurinn stendur frammi fyrir, þá getur það aukið trú þess nýgreinda að unnt sé að takast á við krabbameinið og von um betri líðan í framtíðinni. Rannsóknir sýna að jafningjastuðningur er mikils metinn og í sumum tilfellum meira en stuðningur fagaðila. Einnig getur stuðningurinn létt álagi á aðstandendur, hjálpað skjólstæðingum til að líða betur og eflt þá í samskiptum sínum við heilbrigðisstarfsfólk. Þeir sem fá stuðning óska gjarnan eftir frekari stuðningi og er það til marks um hversu hjálplegt það er. Þá sýna rannsóknir að jafningjastuðningur bætir aðlögun að krabbameini, minnkar þunglyndi og eykur trú á að geta tekist á við krabbameinið á árangursríkan hátt.
