Er það virkilega áhættunnar virði að fara í ljós?
Sumir hugsa kannski: "Æ, þetta er bara smá brúnka. Mér finnst ég líta betur út og þetta tekur svo stuttan tíma - þetta getur varla verið svo mikið mál ? "
Gefðu þér stund til að kynna þér málið og hugsa þetta til enda:
- Samkvæmt lögum mega börn og unglingar yngri en 18 ára ekki nota ljósabekki. Það er ekki að ástæðulausu.
- Ljósabekkir eru staðfestur krabbameinsvaldur skv. Alþjóðlegu krabbameinsrannsóknastofnuninni (IARC) og tilheyra flokki 1 krabbameinsvalda, þar sem m.a. sígarettur eru einnig.
- Útfjólubláir geislar geta skaðað erfðaefni húðfruma og þannig aukið líkurnar á húðkrabbameinum, þar á meðal sortuæxlum sem er alvarlegasta tegund húðkrabbameina.
- Árlega greinast að meðaltali um 60 einstaklingar á Íslandi með sortuæxli og 11 deyja af völdum þess.
- Ljósabekkir gefa frá sér útfjólubláa geislun sem er mun sterkari en í sólarljósi. Þeir geta valdið skaða á húð á mjög stuttum tíma.
- Húð yngri einstaklinga er viðkvæmari en þeirra sem eldri eru, þess vegna er þeim enn hættara við skaða af völdum útfjólublárra geisla sem leitt getur til krabbameins seinna meir.
- Hrukkumyndun, öldrunarblettir og slappleiki húðar kemur fyrr fram ef húð hefur orðið fyrir skaða af völdum útfjólublárra geisla.
- Engin sólbrúnka er „örugg“ eða „holl“. Brúni liturinn er varnarviðbragð húðarinnar þegar útfjólubláir geislar fara að valda skaða.
- Því oftar og meira sem húðin verður brún eða brennur, því meir aukast líkurnar á húðkrabbameini seinna meir.
Öllum er alfarið ráðlagt frá því að nota ljósabekki.
Einnig er öllum ráðlagt að verja sig gegn mikilli sól við leik og störf úti við.