Shinrin-yoku náttúrumeðferð til streitulosunar og endurheimtar
Opnir tímar í náttúrumeðferðina Shinrin-yoku (Skógarbað) í Heiðmörk. Skrá þarf þátttöku, takmarkaður fjöldi.
Ætlað fólki sem hefur fengið krabbamein og aðstandendum.
Shinrin-yoku, ,,skógarbað” er hæglætis útivist í skóglendi sem þróuð var í Japan. Slökun er leidd með áherslu á tengsl við náttúruna. Gengin er stutt vegalengd (að hámarki 1 km) og á leiðinni er þátttakendum auðveldað að slaka á, virkja skynfærin og efla tengsl við náttúru og sig sjálf. Einnig gefst tækifæri til að sitja í þögn og að deila upplifun sinni . Markmiðið er aukin ró og betri líðan. Rannsóknir hafa sýnt fram á ýmis önnur jákvæð áhrif s.s. bætta einbeitingu og aukna orku.
Leiðbeinendur eru Gunnþóra Ólafsdóttir, landfræðingur Ph.D. og Íris Lana Birgisdóttir, félagsráðgjafi M.A. sem hafa lokið þjálfun hjá Association of Nature and Forest Therapy (ANFT).
Mikilvægar upplýsingar:
ATHUGIÐ ! Mæting er kl. 12:50 og gangan hefst stundvíslega kl. 13. Ekki er hægt að slást í hópinn eftir að gangan hefst.
Þátttakendur þurfa að koma vel nærðir og útbúnir fyrir 2 tíma rósemdar útivist og kyrrsetu. Þátttakendur fá vatnsheldar sessur til afnota. Hlýr, þægilegur og vatnsheldur klæðnaður og grófir skór eru nauðsyn. Gott er að taka með sér teppi, vatn og jafnvel eitthvað heitt að drekka á hitabrúsa.
Þátttaka er ókeypis en takmarkast við 15 manns í hvert skipti og því er nauðsynlegt að skrá sig:
Náttúrumeðferðin fer fram í Heiðmerkurskógi, mæting er inni í Elliðavatnsbænum:
Ef veðurspá er óhagstæð getur þurft að aflýsa eða fresta og verða þátttakendur þá látnir vita með tölvupósti og/eða SMS.
Krabbameinsfélagið býður upp á shinrin-yoku skógarböð í samstarfi við Nature and Forest Therapy Iceland og Skógræktarfélag Reykjavíkur.