Sóknarfæri í forvörnum - upptaka frá málþingi
Eitt af helstu markmiðum Krabbameinsfélagsins er að fækka þeim sem fá krabbamein og það hlýtur að vera sameiginlegt markmið allra landsmanna, eða hvað? Húsfyllir var á nýafstöðnu málþingi sem haldið var í tengslum við aðalfund félagsins og bar heitið Viljum við að færri fái krabbamein? Eru vannýtt tækifæri til þess í íslensku samfélagi?
Forvarnir sem samvinnuverkefni
Hlíf Steingrímsdóttir, formaður Krabbameinsfélagsins, setti málþingið og undirstrikaði mikilvægi forvarna í baráttunni gegn krabbameinum. „Spurningin snýr að einu mikilvægasta verkefni okkar tíma, sem eru forvarnir gegn krabbameinum og almenn heilsuefling á landsvísu.“ Hún ítrekaði jafnframt mikilvægi þess að forvarnir byggðu á gagnrýndri þekkingu, samvinnu og pólitískri forgangsröðun, en á málþinginu voru fulltrúar stjórnvalda og sérfræðingar félagsins, ásamt áhugafólki um lýðheilsu.
Lýðheilsumat í farvatninu
Alma D. Möller, heilbrigðisráðherra, flutti ávarp í upphafi málþingsins og talaði m.a. fyrir betri og samfelldari tengingu forvarna, heilsueflingar og heilbrigðisþjónustu. „Lýðheilsa verður að komast á dagskrá stjórnmálanna. Við þurfum að huga að lýðheilsu í öllum stefnum hins opinbera og gera lýðheilsumat í flestri lagasetningu, rétt eins og umhverfismat.“ Vinna við það er hafin hjá embætti landlæknis, sem mun aðstoða ráðuneyti við útfærsluna.
Upptaka frá málþinginu - Viljum við að færri fái krabbamein? Eru vannýtt tækifæri til þess í íslensku samfélagi?
Forvarnir gegn krabbameinum
Krabbameinsfélagið hefur sett sér það markmið að fækka um 18% krabbameinum með þekkta áhættuþætti fram til ársins 2040. Til að vinna að því markmiði er mikilvægt að vita hversu vel Íslendingar þekkja til áhættuþáttanna. Krabbameinsfélagið gerir reglulega kannanir á þekkingu meðal almennings á helstu áhættuþáttum. Niðurstöður benda til árangurs af fræðslustarfi Krabbameinsfélagsins, sem sést af verulega aukinni þekkingu fólks á þeim áhættuþáttum sem félagið hefur lagt mesta áherslu á; áfengi, hreyfingu, mataræði og líkamsþyngd. Sóknarfæri eru þó vissulega enn til staðar. Þekking er ein sér ekki nægjanleg og langt frá því sjálfgefið að hún endurspeglist í hegðun eða lífsvenjum fólks. Til að svo megi verða þurfa aðilar víða í samfélaginu að leggjast á eitt, með stjórnvöld í fararbroddi. Er þá ekki bara átt við heilbrigðisyfirvöld, því málefnið tengist langtum fleiri hliðum samfélagsins, til dæmis skólaumhverfinu, matvöruverði, merkingum á matvælum og markaðssetningu. Víðtækar og fjölbreyttar aðgerðir á ýmsum sviðum eru nauðsynlegar ef árangur á að nást. Norrænu krabbameinsfélögin hafa unnið sérstakar ráðleggingar til stjórnvalda sem miða að því að koma í veg fyrir ofþyngd og offitu hjá börnum, til að draga úr krabbameinsáhættu á fullorðinsárum. Ráðleggingarnar voru kynntar á málþinginu og sýna með óyggjandi hætti hve margra leiða er hægt að grípa til, til að draga úr krabbameinsáhættu.
Við þökkum öllum þeim sem komu að málþinginu með einum eða öðrum hætti kærlega fyrir sitt framlag og öllum þeim sem hlustuðu fyrir að láta sig málið varða.