Markviss hreyfing eftir lyfjameðferð gegn ristilkrabbameini bætir lífshorfur
Ný rannsókn, gefur vísbendingar um að markviss hreyfing geti bætt lífshorfur fólks sem fengið hefur ristilkrabbamein. Rannsóknin er sú fyrsta sinnar tegundar í heiminum að mati rannsakenda.
Líkamleg hreyfing og áreynsla hefur margvíslegan ávinning og er eitt það allra mikilvægasta sem við getum gert til að stuðla að heilbrigði okkar. Forvarnargildi hreyfingar í tengslum við krabbameinsáhættu er óumdeilanlegt, en áreynsla hefur áhrif á margvísleg líffræðileg ferli í líkamanum sem mörg hver hafa áhrif á krabbameinsáhættu. Þá hafa rannsóknir einnig sýnt fram á að reglubundin hreyfing hefur bein áhrif til að draga úr líkum á krabbameini í ristli og endaþarmi, brjóstum og legbol.
Á nýafstöðnu málþingi Krabbameinsfélagsins var fjallað ítarlega um sóknarfæri í forvörnum gegn krabbameinum og mikilvægi þess að fólk þekki helstu áhættuþætti.
Minni líkur á endurkomu
Rannsóknin, Structured Exercise after Adjuvant Chemotherapy for Colon Cancer, sem birtist í New England Journal of Medicine í júní á þessu ári, stóð yfir í 17 ár og náði til 889 einstaklinga sem allir höfðu greinst með ristilkrabbamein. Að loknum skurðaðgerðum og lyfjameðferðum, var þátttakendum slembiraðað í tvo hópa. Annar hópurinn fékk fræðslu um ávinning hreyfingar án skipulagðrar þjálfunaráætlunar (samanburðarhópur) en hinum var að auki boðin markviss þjálfun þar sem þeir fengu sjálfir að velja hvaða hreyfing hentaði þeim best (rannsóknarhópur), en markmiðið var að auka hreyfingu af meðalákefð um tvo og hálfan tíma á viku yfir þriggja ára tímabil.
Niðurstaðan var sú að rannsóknarhópurinn hafði marktækt betri sjúkdómsfría lifun, metin sem hlutfallsleg áhætta á endurkomu sjúkdóms, öðru krabbameini eða dauða, miðað við samanburðarhópinn.Heildarlifun mældist einnig betri í rannsóknarhópnum miðað við samanburðarhópinn en sá munur var ekki marktækur.
Þekkt er að líkamleg áreynsla í og eftir krabbameinsmeðferð hefur jákvæð áhrif á líkamsstarfsemi og eykur lífsgæði. Nú höfum við hins vegar í fyrsta skipti mjög sterkar vísbendingar um að markviss hreyfing geti bætt lífslíkur sjúklinga sem lokið hafa lyfjameðferðum við krabbameinum.
Hreyfing getur skipt sköpum
„Þetta er fyrsta framsýna, slembiraðaða rannsóknin sem rannsakar áhrif hreyfingar á útkomu sjúkdómsins hjá einstaklingum með læknanlegt ristilkrabbamein,” segir Sigurdís Haraldsdóttir, yfirlæknir krabbameinslækningadeildar Landspítala. Niðurstöðurnar sýna að mati Sigurdísar með óyggjandi hætti fram á mikilvægi hreyfingar og lífsstíls í tengslum við krabbameinsáhættu. „Í útskriftarviðtali fær fólk fræðslu um mikilvægi hreyfingar og er hvatt til að tileinka sér heilbrigðan lífstíl. Þessi rannsókn rennir styrkum stoðum undir þessar áherslur og er vísbending um að jafnvel þurfi markvissara utanumhald með þessum þáttum,” segir Sigurdís einnig.
Samkvæmt upplýsingum úr Krabbameinsskrá greinast árlega tæplega 200 einstaklingar hérlendis með ristil- og endaþarmskrabbamein. Þessi tegund krabbameina er önnur algengasta dánarorsök af völdum krabbameina á Íslandi, en að meðaltali látast 65 árlega úr sjúkdómnum. Halla Þorvaldsdóttir, framkvæmdastjóri Krabbameinsfélagsins, segir niðurstöður rannsóknarinnar hvatningu fyrir heilbrigðiskerfið og stjórnvöld um að tryggja þeim sem fengið hafa krabbamein þjálfun sem byggir á gagnreyndri þekkingu. „Við myndum ekki hika við að innleiða lyf sem gætu skilað þeim árangri sem lýst er í rannsókninni. Rannsóknin sýnir með afgerandi hætti hve mikilvægt er að tryggja fólki þjálfun við hæfi. Það bætir ekki bara lífsgæði fólks heldur getur bókstaflega bjargað mannslífum.”