Ekki láta blekkjast á ,,sólarlausum” og köldum sumardögum
Ímyndaðu þér sumardag á Íslandi. Veðrið getur verið ýmiskonar ekki satt? Ef úti er bongóblíða, heiðskír himinn og glampandi sól leiðirðu hugann kannski nokkuð sjálfkrafa að sólarvörnum; berð á þig sólkrem og notar flíkur og höfuðfat til að verja þig. (Ef þetta er ekki lýsandi fyrir þig á sólardögum hvetjum við þig til að kynna þér mikilvægi sólvarna!).
En hvað með þá ófáu íslensku sumardaga þegar hitinn nær ekki tveggja stafa tölu, það blæs hressilega og himininn er alskýjaður? Þarf þá ekki bara helst að huga að því að klæða af sér sumarkuldann til að forkelast ekki, varla þarf að hafa áhyggjur af sólargeislum enda virðist þeim meinaður aðgangur þessa daga?
Ójú kæri lesandi. Ekki láta blekkjast þó blási nokkuð kalt og sólina sé hvergi að sjá. Staðreyndin er sú að allt að 80% sólargeislunar getur borist í gegnum ský. Yfir sumarmánuðina, þegar sólin er hæst á lofti er því sannarlega hægt að sólbrenna á Íslandi þrátt fyrir skýjahulu.
Hérlendis ætti að huga að sólarvörnum frá miðjum apríl og fram í september, þá er sólin sterkust og hætta á sólbruna, líka þegar skýjað er. Hugum sérstaklega vel að börnum því þau eru með viðkvæmari húð en fullorðnir.
Útfjólublá geislun sólar getur valdið skemmdum á húð sem auka líkur á húðkrabbameinum ásamt því að ýta undir öldrun húðarinnar.
Verum skynsöm í sólinni – líka þegar hún felur sig á bakvið skýin.
- Kynntu þér málið betur.
- Ertu kannski með allt á hreinu varðandi sólarvarnir? Kannaði hvort þú fáir allt rétt á þessu þekkingarprófi.