Eitt af helstu einkennum krabbameina er óstöðugt erfðaefni

Árlega greinast tæplega 50 einstaklingar á Íslandi með sortuæxli og um 11 látast að meðaltali á ári úr sjúkdómnum. Sortuæxli er alvarlegasta gerð húðkrabbameina og verður þegar litfrumur, sem oft kallast sortufrumur, breytast í krabbameinsfrumur.

Stefán Sigurðsson, prófessor við Læknadeild Háskóla Íslands, fer fyrir hópi sem rannsakar MITF próteinið, sem er mjög mikilvægt í myndun sortuæxla. MITF próteinið er mikilvægt fyrir þroskun litfrumna en er líka mikilvægt í framgöngu sortuæxla.

Rannsókn okkar mun auka skilning okkar á því hvert hlutverk MITF er í að viðhalda stöðugleika erfðaefnisins, en eitt af helstu einkennum krabbameina er óstöðugt erfðaefni. Með aukinni þekkingu á þeim grunnferlum og þeim þáttum sem viðhalda stöðugleika erfðaefnisins aukast möguleikar okkar á að þróa betri og sértækari meðferðarúrræði,“

segir Stefán og bætir við að vegna hlutverka MITF í sortuæxlum er líklegast að þessi aukna þekking gagnist best þar.

Verkefnið Hlutverk MITF í að viðhalda stöðugleika erfðaefnisins hlaut 10 milljón króna styrk úr Vísindasjóði Krabbameinsfélagsins árið 2021 og 8 milljón króna styrk 2023.

Framvinda (mars 2023)

Framvinda rannsóknarinnar hefur verið mjög góð. Lang flestum markmiðum fyrir fyrra ár styrkveitingar hefur verið náð. Handrit er í smíðum sem sent verður til birtingar innan nokkurra mánaða. Fyrirhuguð vinna seinna ársins er skýr og markmiðið er að senda út aðra grein snemma á árinu 2024.