Krabbameinsfélag Akureyrar og nágrennis

Félagið var stofnað: 21. nóvember 1952.

Hvað er í boði hjá Krabbameinsfélagi Akureyrar og nágrennis haustið 2016?

Skrifstofa Krabbameinsfélagsins á Akureyri (KAON) að Glerárgötu 24, 2. hæð (fyrir ofan VÍS) er opin mánudaga, þriðjudaga og miðvikudaga frá 13:30-16:00. Símatími er einnig þessa daga í síma 461 1470  Netfang félagsins er kaon@simnet.is. Fólk er hvatt til að nýta sér það sem er í boði og er vel tekið á móti öllum sem líta við á skrifstofunni.

Starfsmenn KAON eru þær Halldóra Björg Sævarsdóttir framkvæmdarstjóri (dora@krabb.is) og Katrín Ösp Jónsdóttir hjúkrunarfræðingur (katrin@krabb.is)

  • Heilsurækt og sjúkraþjálfun hjá Sigrúnu Jónsdóttur sjúkraþjálfara. Vatnsleikfimi í sundlaug Akureyrar,innilaug, tvisvar í viku. Mánudaga kl. 15:00-16:00 og fimmtudaga kl. 13:20-14:20. Nánari upplýsingar og skráning er hjá Sigrúnu Jónsdóttur sjúkraþjálfa í síma 862 2434 eða á netfangið bjorkinheilsa@gmail.com.
  • Karlahittingur er alla laugardaga kl. 13:30 í húsnæði félagsins, Glerárgötu 24. Samvera fyrir karlmenn sem greinst hafa með krabbamein.
  • Liðkandi æfingar—slökun Í húsnæði KAON Glerárgötu 24 (ath, það er lyfta í húsinu) þriðjudaga kl. 16:15-17:15. Byrjar 20. september.
  • Samvera á Keramikloftinu Óseyri 18, miðvikudaga kl. 13:00-18:00. Þangað eru allir velkomnir hvort heldur er til að vinna að handverki undir leiðsögn eða til að njóta samverunnar. Ekki þarf að skrá sig sérstaklega.
  • Opið hús, fimmtudaga kl. 13:00-17:00 í húsnæði KAON. Tilgangurinn er að hittast og spjalla og deila hugmyndum yfir kaffi-og tesopa og eiga saman notalega stund. 

Reykjavíkurmaraþonið fór fram 20. ágúst

Reykjavíkurmaraþonið gekk vel. 20 einstaklingar hlupu fyrir félagið og söfnuðu samtals 2.167.500 kr.

Takk kærlega fyrir stuðninginn!

Krabbakureyrar

Ályktun frá Krabbameinsfélagi Akureyrar og nágrennis

 

Akureyri 28. apríl 2016

Krabbameinsfélag Akureyrar og nágrennis sendir frá sér eftirfarandi ályktun:

Þann 14. apríl síðastliðinn kemur fram á vef Velferðarráðuneytisins að Kristján Þór Júlíusson heilbrigðisráðherra hafi mælt fyrir frumvarpi til breytinga á lögum um sjúkratryggingar sem kveður á um nýtt greiðsluþátttökukerfi fyrir heilbrigðisþjónustu.  Á aðalfundi Krabbameinsfélags Akureyrar og nágrennis þann 28.apríl skapaðist umræða um fyrirhugað frumvarp.  Félaginu finnst full ástæða til að lýsa yfir þungum áhyggjum vegna þessara breytinga.  Þó svokallað þak á greiðslu sé gott og gilt þá er ljóst að greiðsluþátttaka einstaklinga á grunnþjónustu mun hækka töluvert og ekki síst fyrir þá sem þurfa grunnrannsóknir krabbameinsgreininga.  Aukin hætta mun skapast á því að fólk fresti krabbameinsrannsóknum og fleiri kostnaðarsömum heimsóknum til sérfræðinga.  Greiningum krabbameina má alls ekki skjóta á frest en hættan er sú að fólk dragi það að leita eftir þeirri þjónustu, þegar kostnaður kemur til með að aukast verulega.Við skorum á stjórnvöld að endurskoða þessar fyrirhuguðu hækkanir á gjaldskrám sem koma til með að fylgja þessum breytingum.

Fyrir hönd stjórnar
Hlíf Guðmundsdóttir formaður

Félagsmenn: 1.360.
Þjónustuskrifstofa er á Glerárgötu 24, 600 Akureyri.
Opið er mánudaga, þriðjudaga og miðvikudaga  kl. 13:30-16:00.
Símatími mánudaga, þriðjudaga og miðvikudaga á opnunartíma í síma

461 1470.  

Viðtalstímar við hjúkrunarfræðing eftir samkomulagi.
Skrifstofusími:  461 1470
Netfang: kaon@simnet.is.
Facebooksíða félagsins - smelltu hér
Vefsíða: www.krabb.is/akureyri
Framkvæmdastjóri: Halldóra Björg Sævarsdóttir, netfang: dora@krabb.is
Hjúkrunarfræðingur: Katrín Ösp Jónsdóttir, netfang: katrin@krabb.is

Stjórn kosin á aðalfundi 28. apríl 2016

 

  • Formaður: Hlíf Guðmundsdóttir, Illugastöðum, 601 Akureyri. S:  462 2699hlif@est.is.
  • Varaformaður: Dóróthea Jónsdóttir, Rimasíðu 3, 603 Akureyri
  • Ritari: Guðbjörg Antonsdóttir, Skíðabraut 17, 620 Dalvík
  • Gjaldkeri: Jón Þ. Óskarsson, Illugastöðum, 601 Akureyri
  • Meðstjórnandi: Anna Ólafsdóttir, Hjarðarlundi 8, 600 Akureyri
  • Meðstjórnandi: Friðrik Vagn Guðjónsson, Dalsgerði 4a, 600 Akureyri
  • Meðstjórnandi: Hólmfríður Kristjánsdóttir, Eyrarlandsvegi 20, 600 Ak.
  • Meðstjórnandi: Lilja Sverrisdóttir, Gullbrekku, 601 Akureyri
  • Meðstjórnandi: Ólöf Leifsdóttir, Huldugili 2, 603 Akureyri

Starfsemi 2015

Skrifstofan er í leiguhúsnæði að Glerárgötu 24 á Akureyri og er opin þrisvar í viku, auk þess sem boðið er upp á viðtalstíma þar fyrir utan. Símatími er sömu daga kl. 10-12. Starfsmenn eru þrír og skipta á milli sín 90% stöðu. Þorbjörg Ingvadóttir framkvæmdastjóri, Jóhanna Júlíusdóttir hjúkrunarfræðingur og Halldóra Björg Sævarsdóttir textílkennari, auk þess sem Sigrún Jónsdóttir sjúkraþjálfari starfar í nánum tengslum við félagið.

Fundir. Stjórnin hélt fimm bókaða stjórnarfundi á árinu 2015. Aðalfundur félagsins var haldinn á Akureyri 27. apríl 2015. Samþykkt var að árgjald til félagsins yrði 3.300 kr. Krabbameinsfélag Akureyrar og nágrennis átti tvo fulltrúa á aðalfundi Krabbameinsfélags Íslands vorið 2015. Starfsmenn sóttu tvo samráðsfundi starfsmanna svæðaskrifstofa Krabbameinsfélags Íslands. Krabbameinsfélag Akureyrar og nágrennis átti þrjá fulltrúa á formannafundi Krabbameinsfélags Íslands haustið 2015.

Starfsemin. Mjög öflug starfsemi er rekin á vegum og í tengslum við Krabbameinsfélag Akureyrar og nágrennis. Skráðar heimsóknir á skrifstofu félagsins á árinu 2015 eru svipaðar og undanfarin ár eða tæplega 450. Þetta eru að langmestu leyti einstaklingar sem sækja Opið handavinnuhús, slökun, jóga og liðkandi æfingar auk fræðslufunda sem haldnir eru á vegum félagsins. Einnig viljum við nefna að sl. haust var stofnaður sérstakur karlahópur sem hittist alla laugardaga í húsnæði félagsins. Í hverri viku sækja um 20 einstaklingar samveru á Keramikloftinu. Um 1.300 manns sóttu því fjölbreytta þjónustu á vegum félagsins árið 2015. Starfsmenn sinna ýmiss konar fræðslu sem tengist forvörnum, stuðningi og kynningu á starfsemi félagsins, bæði til hópa og einstaklinga.

Endurhæfing. Sigrún Jónsdóttir sjúkraþjálfari hefur boðið bæði krabbameinssjúkum og langveikum upp á ókeypis jóga og slökun alla mánudaga í húsnæði félagsins, auk þess að vera með vatnsleikfimi í innilaug Sundlaugar Akureyrar, styrktarþjálfun fyrir hópa í Eflingu og einstaklingsþjálfun, viðtöl og ráðleggingar.

Opið handavinnuhús er alla fimmtudaga kl. 13-17 og hefur verið mjög vel sótt. Umsjón hefur Halldóra Björg Sævarsdóttur textílkennari og er boðið upp á samveru þar sem fólk getur komið með handavinnu og spjallað saman yfir kaffibolla, auk þess sem sérstök fræðsla um valin verkefni hefur verið nokkrum sinnum í vetur.

Keramikloftið. Á hverjum miðvikudegi frá kl. 13-18 hittist fólk á Keramikloftinu. Þar er hægt að vinna með gler, mosaik, keramik o.fl. Þessi samvera hefur gefist vel og hefur verið mjög vel sótt. KAON hefur stutt við þessa starfsemi með ýmsu móti frá byrjun.

Karlahópur. Ákveðið var að stofna sérstakan karlahóp sl. haust og hittast þeir alla laugardaga og spjalla og eru með fræðslufundi.

Viðtöl og stuðningur við skjólstæðinga. Skráð viðtöl og símtöl eru 108. Starfsmenn hafa frá árinu 1998 haldið utan um fjölda viðtala á skrifstofunni.

Stómasamtökin hafa haldið fundi sína í húsnæði félagsins eins og undanfarin ár.

Íbúðir Krabbameinsfélagsins í Reykjavík. Krabbameinsfélag Akureyrar og nágrennis greiðir nú reikninga fyrir afnot af íbúðum og dvöl á sjúkrahóteli að fullu og er þetta alltaf verulega stór útgjaldaliður hjá félaginu.

Söfnun fyrir brjóstaómskoðunartæki. Á stjórnarfundi Krabbameinsfélags Akureyrar og nágrennis þann 3. febrúar kom fram hugmynd um að félagið myndi standa fyrir söfnun á brjóstaómskoðunartæki til Sjúkrahússins á Akureyri og myndi hefja söfnunina á einnar milljónar króna framlagi. Þetta var samþykkt og söfnunin fór fram og gekk mjög vel. Mjög margir, bæði einstaklingar, félög og fyrirtæki lögðu söfnuninni lið. Tækið var síðan afhent formlega 13. nóvember 2015 og var það mikil gleðistund, bæði hjá okkur í félaginu og ekki síður starfsfólki á leitarstöðinni á Sjúkrahúsinu á Akureyri.

Tekjur og fjáraflanir. Helstu tekjur félagsins fyrir utan rekstarstyrk frá Krabbameinsfélagi Íslands, sem greiðir helming af launum starfsmanna og verkefnisstyrk sem gerir okkur kleift m.a. að halda námskeið fyrir krabbameinssjúklinga og aðstandendur, eru félagsgjöldin og styrkir sem félaginu bárust frá félagasamtökum og einstaklingum á árinu. Sú velvild og stuðningur sem allir þessir fjölmörgu aðilar sýna okkur er ómetanlegur og gerir okkur kleift að styðja á margvíslegan hátt við bakið á þeim íbúum á okkar félagssvæði sem greinast með krabbamein. Öllum þessum aðilum færum við innilega þakkir. Án þessa stuðnings væri þetta ekki mögulegt.

Húsnæði. Krabbameinsfélag Akureyrar og nágrennis hefur í mörg ár leigt 110 fermetra húsnæði að Glerárgötu 24. Miklar endurbætur voru gerðar á húsnæðinu og salurinn okkar rúmar nú um 25-30 manns í sæti, auk þess sem rýminu er skipt þannig að auðvelt er að eiga notarlegt spjall við einstaklinga á fleiri en einum stað og segja má að vel hafi tekist til með endurbætur.

Samskipti við fjölmiðla. Starfsmenn hafa átt mjög góð samskipti við fjölmiðla á félagssvæðinu og hafa bæði birst viðtöl í Dagblöðum og tímaritum, auk þess sem allir starfsmenn hafa komið oftar en einu sinni í sjónvarpsviðtöl vegna ýmissa viðburða sem tengjast t.d. starfsemi félagins auk þess að vekja athygli á ýmsu sem hefur verið ofarlega á baugi í almennri umræðu í þjóðfélaginu. N4 sjónvarp hefur verið okkur sérlega vinsamlegt með að kynna starfsemi okkar og koma til móts við kostnað vegna auglýsinga t.d. í Sjónvarpsdagskránni. Færum við þeim bestu þakkir fyrir.

Þorbjörg Ingvadóttir.

Starfsemi 2014

Skrifstofan er í leiguhúsnæði að Glerárgötu 24 á Akureyri og er opin mánudaga og þriðjudaga frá kl. 13 til 16, auk þess sem boðið er uppá viðtalstíma utan opnunartíma á skrifstofunni. Símatími er alla miðvikudaga frá kl. 10-12. Starfsmenn eru þrír og skipta á milli sín 90% stöðu. Þorbjörg Ingvadóttir framkvæmdastjóri, Jóhanna Júlíusdóttir hjúkrunarfræðingur og Halldóra Björg Sævarsdóttir textílkennari, auk þess sem Sigrún Jónsdóttir sjúkraþjálfari starfar í nánum tengslum við félagið.

Aðalfundur félagsins var haldinn á Akureyri 20. maí 2014. Stjórn lagði fram tillögu um að árgjald til félagsins yrði óbreytt frá síðasta ári, eða 3.000 kr. og var sú tillaga samþykkt. Engar breytingar urðu á stjórn félagsins að þessu sinni. Stjórnin hélt fimm bókaða stjórnarfundi á árinu 2014.

Samskipti við Krabbameinsfélag Íslands.

Aðalfundur Krabbameinsfélags Íslands var haldinn 10. maí og fulltrúi Krabbameinsfélags Akureyrar og nágrennis á þeim fundi var Friðrik Vagn Guðjónsson auk þess sem Jóhanna Júlíusdóttir og Halldóra Björg Sævarsdóttur sátu fundinn. Formannafundur Krabbameinsfélags Íslands var haldinn á Akureyri 4. október og sá Krabbameinsfélag Akureyrar og nágrennis um alla umgjörð er varðaði fundinn. Starfsmenn sóttu tvo samráðsfundi starfsmanna svæðaskrifstofa Krabbameinsfélagsins. 

Starfsemin.

Mjög öflug starfsemi er rekin á vegum og í tengslum við Krabbameinsfélag Akureyrar og nágrennis. Skráðar heimsóknir á skrifstofu félagsins á árinu 2014 eru 465. Þetta eru að langmestu leyti einstaklingar sem sækja Opið handavinnuhús, slökun, jóga og liðkandi æfingar auk fræðslufunda sem haldnir eru á vegum félagsins. Má þar t.d. nefna námskeiðið Gott útlit betri líðan, heilsuréttarnámskeiðið Sætt án samviskubits, námskeið í orkeringu o.fl. Í hverri viku sækja á u.þ.b. 20 einstaklingar samveru á Keramikloftinu, og skráð viðtöl (bæði komur á skrifstofu og símaviðtöl) eru skráð 114 á árinu. Kostnaður félagsins vegna aukinnar starfsemi og stuðnings við krabbameinsgreinda og fjölskyldur þeirra hefur aukist verulega á milli áranna 2013 og 2014 og munar þar tæplega 1.000.000 kr. á milli ára. Greiðsla vegna dvalarkostnaðar sjúklinga í íbúðum Krabbameinsfélagsins hefur líka aukist verulega milli ára og er nú rétt tæplega ein milljón króna miðað við rúmlega 400.000 kr. árið 2013.

Fræðsla/fundir ofl.

Starfsmenn sinna ýmis konar fræðslu sem tengist forvörnum, stuðningi og kynningu á starfsemi félagsins, bæði til hópa og einstaklinga.

Endurhæfing.

Sigrún Jónsdóttir sjúkraþjálfari hefur boðið bæði krabbameinssjúkum og langveikum upp á ókeypis hugleiðslu og slökun alla þriðjudaga í húsnæði félagsins, auk þess að vera með vatnsleikfimi í innilaug Sundlaugar Akureyrar, styrktarþjálfun fyrir hópa í Eflingu og einstaklingsþjálfun, viðtöl og ráðleggingar.

Opið handavinnuhús.

Opið handavinnuhús er í boði alla fimmtudaga frá kl. 13-17 og hefur verið mjög vel sótt. Umsjón hefur Halldóra Björg Sævarsdóttur textílkennari og er boðið upp á samveru þar sem fólk getur komið með handa-vinnu og spjallað saman yfir kaffibolla. Auk þess sem sérstök fræðsla um valin verkefni hefur verið nokkrum sinnum í vetur í tengslum við Opna húsið.

Keramikloftið og Punkturinn.

Á hverjum miðvikudegi frá kl. 13-18 hittist fólk á Keramikloftinu. Þar er hægt að vinna með gler, mosaik, keramik o.fl. Þessi samvera hefur gefist vel og hefur verið mjög vel sótt. Krabba-meinsfélag Akureyrar og nágrennis hefur stutt við þessa starfsemi með ýmsu móti frá byrjun. Á Punktinum getur fólk komið alla fimmtudagsmorgna og nýtt þá aðstöðu sem þar er í boði og fengið aðstoð og leiðbeiningar t.d. við saumaskap, útskurð, bókband o.m.fl. 

Viðtöl og stuðningur við skjólstæðinga.

Skráð viðtöl og símtöl eru 114. Starfsmenn hafa frá árinu 1998 haldið utan um fjölda viðtala á skrifstofunni.

Stómasamtökin.

Stómasamtökin hafa haldið fundi sína í húsnæði félagsins eins og undanfarin ár.

Líf og loft eru samtök lungnasjúklinga.

Samtökin hafa fundað í húsnæði okkar.

Íbúðir Krabbameinsfélagsins í Reykjavík.

Um áramótin 2014/15 höfðu félaginu borist reikningar vegna dvalar í íbúðum Krabbameinsfélagsin vegna 533 gistinátta. Hver sólarhringur kostar 1.850 kr. og greiddi fél-agið fyrri hluta ársins 75% af hverjum reikningi, en á haustdögum ákvað stjórn Krabbameinsfélag Akur-eyrar og nágrennis að greiða þessa reikninga að fullu.  

Tekjur og fjáraflanir.

Helstu tekjur félagsins fyrir utan rekstarstyrk frá Krabbameinsfélagi Íslands sem greiðir helming af launum starfsmanna og verkefnisstyrk sem gerir okkur kleift m.a. að halda námskeið fyrir krabbameinssjúklinga og aðstandendur, eru félagsgjöldin og styrkir sem félaginu bárust frá félagasamtökum og einstaklingum á árinu. Sem dæmi má nefna að Félag matreiðslumeistara á Norðurlandi var með hátíðarkvöldverð á Hótel KEA í október, þar sem fyrirtæki á svæðinu keyptu miða og buðu síðan útvöldum. Annað dæmi er fjáröflunarsamkoma sem tengdist Dömulegum dekurdögum á Icelandair hóteli í lok október.

Velvild og stuðningur.

Sú velvild og sá stuðningur sem allir þessir fjölmörgu aðilar sýna okkur er ómetanlegur og gerir okkur kleift að styðja á margvíslegan hátt við bakið á þeim íbúum á okkar félagssvæði sem greinast með krabbamein. Öllum þessum aðilum færum við innilega þakkir. Án þessa stuðnings væri þetta ekki mögulegt.

Húsnæði.

Krabbameinsfélag Akureyrar og nágrennis hefur í mörg ár leigt 110 fermetra húsnæði að Glerárgötu 24. Miklar endurbætur voru gerðar á húsnæðinu og salurinn okkar rúmar nú um 25-30 manns í sæti, auk þess sem rýminu er skipt þannig að auðvelt er að eiga notarlegt spjall við einstaklinga á fleiri en einum stað og segja má að vel hafi tekist til með endurbætur.

Samskipti við fjölmiðla.

Starfsmenn hafa átt mjög góð samskipti við fjölmiðla á félagssvæðinu og hafa bæði birst viðtöl í Dagblöðum og tímaritum, auk þess sem allir starfsmenn hafa komið oftar en einu sinni í sjónvarpsviðtöl vegna ýmissa viðburða sem tengjast t.d. starfsemi félagins auk þess að vekja athygli á ýmsu sem hefur verið ofarlega á baugi í almennri umræðu í þjóðfélaginu. N4 sjónvarp hefur verið okkur sérlega vinsamlegt með að kynna starfsemi okkar og koma til móts við kostnað vegna auglýsinga t.d. í Sjónvarpsdagskránni. 

Færum við þeim bestu þakkir fyrir.

Þorbjörg Ingvadóttir.  


Var efnið hjálplegt?