Sigriður Sólan Guðlaugsdóttir 14. des. 2018

VON vinkonur safna einni milljón fyrir Krabbameinsfélagið

  • VON vinkonur

VON krúsir eru hannaðar og framleiddar af fimm vinkonum úr Verslunarskólanum. Þær Anna María, Páldís, Arndís, Elfa og Valgerður fengu þá hugmynd í frumkvöðlaáfanga að framleiða keramikbolla og selja til styrktar Krabbameinsfélaginu. 

Á dögunum komu þær færandi hendi í Skógarhlíðina og afhentu eina milljón króna sem var ágóði af sölu bollanna.

Stelpurnar þekkja allar til krabbameina en mæður tveggja þeirra voru að kljást við krabbamein þegar þær réðust í verkefnið. Orðið VON kom því fljótlega upp í ferlinu og þær ákváðu að láta það standa í botni bollanna. 

Von-krus„Það kom okkur virkilega á óvart hversu vel var tekið á móti hugmyndinni en svo kom það okkur ekki síður á óvart hversu tímafrekt ferlið var að búa til og mála krúsirnar,“ segir Páldís Björk Guðnadóttir, en stelpurnar fengu aðstoð hjá Ragnheiði Ingunni Ágústsdóttur, frænku einnar þeirra sem starfar við keramíkgerð: „Ferlið er samt sem áður búið að ganga ótrúlega vel, en það komu stundir þar sem við áttum erfitt með að sjá fyrir endann á þessu öllu vegna þess hversu vel gekk að selja krúsirnar.“

VON-vinkonur-og-R

Á myndinni eru Elfa, Páldís, Valgerður, Ragnheiður Ingunn, Anna María og Valdís. 

Upphaflegt markmið var að selja 100 krúsir, en að lokum seldust um 450 bollar: „Allir vilja láta gott af sér leiða og krabbamein snertir því miður næstum alla einhvern tímann í lífinu,” segir Páldís.

„Þessar ungu konur eru náttúrulega algjörlega magnaðar og það verður gaman að fylgjast með þeim. Þetta eru sannar athafnakonur og við getum litið björtum augum til framtíðarinnar ef unga kynslóðin er jafn kraftmikil og vel hugsandi og VON vinkonurnar,“ segir Halla Þorvaldsdóttir, framkvæmdastjóri Krabbameinsfélagsins sem tók á móti styrknum á dögunum.

Krúsirnar voru aðallega seldar í gegnum Facebook og Instagramsíður en einnig á nokkrum opnum húsum þangað sem fólk gat komið og sótt bolla sem það hafði pantað í gegnum netið.

„Þetta ferli hefur sýnt okkur hvað Ísland er lítið og hvað það er auðvelt að láta gott af sér leiða og ná athygli ef maður vill það í raun og veru,“ segir Páldís að lokum.

 


Fleiri nýjar fréttir

17. maí 2022 : 70 ár fyrir 70 andlit - Bjarni Bjarnason

Bjarni Bjarnason læknir var formaður Krabbameinsfélags Íslands frá 1966 til 1973 en hafði áður verið varaformaður þess síðan 1960. Hann var í stjórn Krabbameinsfélags Reykjavíkur frá 1951 og formaður frá 1960 til 1965. 

Lesa meira

16. maí 2022 : 70 andlit fyrir 70 ár - Guðbjartur Hannesson

Alþjóðlegi krabbameinsdagurinn 4. febrúar 2011 var merkisdagur. Þá tilkynnti Guðbjartur Hannesson, velferðarráðherra á árunum 2011 til 2013, að hann hygðist láta vinna krabbameinsáætlun fyrir Ísland. Ákvörðunina tengdi hann 60 ára afmæli Krabbameinsfélagsins.

Lesa meira

12. maí 2022 : Bjóðum Hörpu velkomna

Við erum stolt af því að bjóða nýjan starfsmann, Hörpu Ásdísi félagsráðgjafa, til starfa í ráðgjafarteymi Krabbameinsfélagsins. Harpa vann hjá Félagsþjónustu Reykjavíkur í 9 ár, áður en hún færði sig yfir á Reykjalund þar sem hún starfaði síðastliðin 22 ár.

Lesa meira

11. maí 2022 : Málþing: Krabba­meins­áætlun - á áætlun?

Málþing Krabbameinsfélags Íslands, laugardaginn 21. maí kl. 10 – 12 í Skógarhlíð 8, Reykjavík. Erindi á málþinginu flytja fulltrúar Krabba­meins­félagsins, Landspítala, heilbrigðis­ráðu­neytisins auk landlæknis.

Lesa meira

11. maí 2022 : 70 andlit í 70 ár - Lára Vigfúsdóttir

Fólk sem vill láta gott af sér leiða eftir sinn dag arfleiðir Krabbameinsfélagið reglulega að eigum sínum eða hluta þeirra. Lára Vigfúsdóttir, innanhússarkitekt frá Vestmannaeyjum er ein þeirra. Hennar erfðagjöf gerði Krabbameinsfélaginu mögulegt að bjóða fyrstu árgöngum sem boðið var í skimun fyrir legháls- og brjóstakrabbameinum á árinu 2020 ókeypis skimun. 

Lesa meira

Var efnið hjálplegt?