Leiðrétting vegna frétta um biðtíma leghálssýna
Biðtími eftir niðurstöðum leghálssýna hjá Leitarstöð Krabbameinsfélagsins varð lengstur átta vikur en ekki fjórir mánuðir.
Bæði RÚV og Fréttablaðið hafa tekið til umfjöllunar fyrirspurn Þorbjargar Sigríðar Gunnlaugsdóttur á Alþingi 23. febrúar um greiningu á leghálssýnum og tafir á niðurstöðum þeirra. Svandís Svavarsdóttir heilbrigðisráðherra sagði þar að svartíminn hjá Leitarstöð Krabbameinsfélags Íslands hafi á tímabilum verið upp í fjóra mánuði.
Af þessu tilefni vill Krabbameinsfélagið ítreka að biðtími eftir niðurstöðum úr leghálsskimun varð lengstur átta vikur í fyrrahaust, og heyrði til undantekninga. Aðgerðir til að auka þátttöku kvenna í skimunum skiluðu árangri og komum kvenna í skimanir fjölgaði mjög milli áranna 2018 og 2019. Sá árangur hélst árið 2020, ef tillit er tekið til áhrifa af Covid-19 og fyrirhuguðum flutningi skimana. Þannig var september 2020 til að mynda metmánuður, sé miðað við fjölda kvenna sem kom í Leitarstöðina í leghálsskimun.
Krabbameinsfélagið tekur undir með heilbrigðisráðherra, að nú skiptir öllu að byggja aftur upp traust kvenna á skimunum. Þær eru gríðarlega mikilvæg forvarnaraðgerð sem eiga stóran þátt í að Ísland er í fremstu röð í heiminum varðandi leghálskrabbamein. Árangurinnbyggist á þátttöku kvenna.