Upp með sokkana – þú ert eldri en þú heldur
Mottumars, árlegt árvekni- og fjáröflunarátak Krabbameinsfélagsins tileinkað baráttunni gegn krabbameinum í körlum, hefst formlega í dag 1. mars. Í Mottumars tökum við höndum saman í vitundarvakningu um krabbamein hjá körlum og öflum fjár fyrir mikilvægri starfsemi. Minnum karlmenn sérstaklega á að kynna sér og þekkja hvaða einkenni geta bent til krabbameins og hvetjum þá til að leita fljótt til læknis verði þeir varir við einkenni.
Við missum árlega 320 feður, afa, bræður, syni og vini úr krabbameinum, þrátt fyrir að lífshorfur hafi batnað mikið. Fyrir 40 árum lifðu 25% karla sem greindust með krabbamein í fimm ár eða lengur eftir greiningu en nú geta 70% karla vænst þess að lifa svo lengi eða lengur.
„Við viljum ná enn betri árangri og með samhentu átaki getum við það“ segir Halla Þorvaldsdóttir, framkvæmdastjóri Krabbameinsfélagsins.
Slagorð Mottumars í ár er þú ert eldri en þú heldur og byggir á því sem margir karlar geta líklega tekið undir - nefnilega það að upplifa að þeir séu enn það ungir að þeir þurfi ekki að gefa heilsufarinu sérstaklega gaum. Allir ættu þó að þekkja einkenni sem geta bent til krabbameins og sérstaklega ættu karlmenn í kringum fimmtugt og eldri að vera vakandi fyrir þeim og bregðast við ef þeirra verður vart því líkurnar á að greinast með krabbamein aukast eftir því sem aldurinn hækkar.
Farðu til læknis ef þú ert með einkenni
Ný rannsókn Krabbameinsfélagsins leiddi í ljós að almennt leituðu karlar seinna til læknis en konur og 14% karla hittu ekki lækni fyrr en meira en ári eftir að einkenna varð vart. Því fyrr sem krabbamein greinast því betri eru batahorfur.
Finndu hjartað í sokkunum
Mottumarssokkarnir í ár eru einstaklega fallegir
Við hönnun Mottumarssokkana í ár nutum við liðsinnis hins landsþekkta hönnunarfyrirtækis Farmers Market sem hjónin Bergþóra Guðnadóttir hönnuður og Jóel Pálsson tónlistarmaður stofnuðu árið 2005. Sokkarnir eru einstaklega fallegir, prýddir símynstri sem hannað er með tilvísun í norræna arfleifð og vísar í mynstur í prjóni, vefnaði og útsaumi frá fyrri tímum. Ef vel er að gáð má sjá að í eyðunum leynist annað mynstur - hjörtu sem kallast skemmtilega á við hin norrænu stef.
Öll starfsemi Krabbameinsfélagsins byggist á stuðningi einstaklinga og fyrirtækja í landinu.
- Kynntu þér allt um Mottumars hér.
- Mottumarssokkana má nálgast í Vefverslun Krabbameinsfélagsins, Mottumarsbúðinni í Skógarhlíð 8 og á fjölmörgum sölustöðum um land allt .