Því minna áfengi, því betra
Metsala var á áfengi í Vínbúðum árið 2020. Jafnvel þótt skýringuna megi finna í færri ferðum á veitingastaði eða Fríhöfnina, er rétt að staldra við og minna á að áfengisneysla er áhættuþáttur þegar kemur að krabbameinum.
Viðbrögð Krabbameinsfélagsins við fréttum af sölu áfengis í Vínbúðum
Samkvæmt frétt í Morgunblaðinu reyndist áfengissala árið 2020 í Vínbúðunum sú mesta nokkru sinni. Aukningin er nær alfarið rakin til víðtækra áhrifa covid19 þar sem mun minni sala hafi farið fram í Fríhöfn og einnig á veitiningastöðum og börum. Hvort sem þetta þýði í raun meira eða minna áfengismagn en Íslendingar innbyrða að jafnaði á ársgrundvelli er upplagt að minna á að áfengi er engin venjuleg neysluvara.
Áfengi er staðfestur krabbameinsvaldur
Áfengi er meðal annars staðfestur krabbameinsvaldur í mönnum samkvæmt flokkun Alþjóðakrabbameinsrannsóknarstofnunarinnar (IARC) og tengist áfengisneysla auknum líkum á krabbameinum í munnholi, koki, barkakýli, vélinda, lifur, brjóstum, ristli og endaþarmi. Að auki eru vel þekkt fjölmörg önnur neikvæð áhrif áfengisneyslu, t.d. á starfsemi heila, lifrar, hjarta – og æðakerfis, á andlega heilsu, auknar líkur á slysum, ofbeldi og sjálfsvígum og er þá langt í frá allt upp talið.
Verum meðvituð um áhættuna
Áfengisneysla er samofin íslensku samfélagi og menningu á ýmsan hátt og þykir sjálfsögð við fjölmörg tækifæri. Á ýmsum vettvangi, meðal annars samfélagsmiðlum, er áfengisdrykkju hampað og hún sýnd í jákvæðu ljósi, mikið í tengslum við hin ýmsu tækifæri þegar fólk kemur saman en einnig sem leið til að slaka á.
Mikilvægt er að fólk sé meðvitað um neikvæð áhrif áfengisdrykkju þó að mörgum þyki það óskemmtileg umræða.
Því minna, því betra
Hafa ber í huga að almennt eru neikvæð áhrif áfengis háð því magni sem drukkið er. Þannig aukast líkur á krabbameinum jafnt og þétt eftir því sem áfengisneyslan er meiri. Það þýðir að þó best sé að sleppa áfengisneyslu alfarið er samt alltaf líka heilsufarslegur hagur af því að draga úr henni.
Líklega drekka margir áfengi nær hugsunarlaust við ýmis tækifæri. Óhætt er hins vegar að mæla með því að fólk reyni að vera meðvitað um hve oft og hve mikið er drukkið því margir gætu dregið úr áfengisneyslu með því að hafa yfirsýn og með því að nýta sér skipulega aðferðir með það í huga. Svo nokkur dæmi séu nefnd er hægt að ákveða fyrirfram við hvaða tækifæri sé drukkið og hvenær ekki, ákveða líka fyrirfram magnið, blanda veikari drykki, nota minni vínglös og láta ekki undan þrýstingi annarra.
Því minna, því betra – þinni heilsu í hag.