Þakklæti og gleði réði ríkjum á Styrkleikunum
Styrkleikar Krabbameinsfélagsins voru haldnir um síðastliðna helgi í annað sinn á Selfossi. Í heildina tóku um 500 þátttakendur þátt með því að ganga 23.677 hringi, eða rúmlega 5.900 km., á meðan leikarnir stóðu.
Styrkleikarnir eru hluti af Global Relay for Life, alheimsviðburði sem á uppruna sinn hjá ameríska krabbameinsfélaginu. Sambærilegir leikar eru haldnir á 5.000 stöðum í 30 löndum í sex heimsálfum. Leikarnir snúast um að sýna stuðning í verki með því að halda boðhlaupskefli gangandi í heilan sólarhring, sem er táknrænt fyrir að ekki fæst hvíld frá krabbameini. Halla Þorvaldsdóttir, framkvæmdastjóri Krabbameinsfélagsins, og Fjóla Steindóra Kristinsdóttir, bæjarstjóri Árborgar, settu leikana með því að afhenda Svanhildi Ólafsdóttur, formanni Krabbameinsfélags Árnessýslu, boðhlaupskeflið. Í kjölfarið gengu allir þátttakendur saman fyrsta hringinn undir tónlist frá Lúðrasveit Þorlákshafnar.
Fjölbreytt skemmtidagskrá var yfir daginn með listafólki úr heimabyggð sem allt gaf vinnu sína. Dagskráin náði ákveðnum hápunkti með ljósastund þegar rökkva tók um kvöldið, en þá var kveikt á kertum í sérútbúnum pokum sem þátttakendur höfðu skreytt og skrifað kveðjur á. Pokarnir mynduðu hjarta.
Krabbameinsfélagið þakkar Krabbameinsfélagi Árnessýslu, sveitarfélaginu Árborg, styrktaraðilum og öllum þeim sem komu að undirbúningi og framkvæmd leikanna kærlega fyrir ómetanlegt framlag við að gera Styrkleikana að þeim einstaka viðburði sem þeir eru.
- Sjáumst á næstu Styrkleikum sem verða haldnir 26. - 27. ágúst á Egilsstöðum.
- Nánari upplýsingar um Styrkleikanna hér.
Helga Guðrún Lárusdóttir, blaðamaður Dagskrárinnar tók meðfylgjandi myndir.
