Birna Þórisdóttir 27. nóv. 2018

Tengsl brjóstapúða við fágætt krabbamein

  • © Krabbameinsfélagið

Umræða í fjölmiðlum í dag um hugsanleg tengsl brjóstapúða með hrjúfu yfirborði við fágætt eitilfrumukrabbamein, anaplastic lar­ge cell lymp­homa (ALCL), byggir ekki á nýjum rannsóknum. Á árunum 1989-2018 greindust 27 einstaklingar á Íslandi með ALCL, þar af einungis fjórar konur. Ekki er vitað hvort einhver kvennanna hafi verið með brjóstapúða.

Umræðuna má rekja til ársins 1997 og styrktist hún árið 2011 þegar yfirvöld, meðal annars í Bretlandi og Bandaríkjunum, lögðu áherslu á að bæði heilbrigðisstarfsfólk og fólk sem fengi brjóstapúða væri meðvitað um hugsanleg tengsl við krabbameinið. Árið 2016 byrjaði Alþjóðaheilbrigðismálastofnunin (WHO) að nota breast implant-associated anaplastic large cell lymphoma (BIA-ALCL) yfir eitilfrumukrabbamein sem gæti myndast vegna brjóstapúða.

ANSM, franska lyfjastofnunin, hyggst boða almenning, heilbrigðisstarfsfólk, rannsakendur og aðra hagsmunaaðila til fundar í byrjun febrúar 2019. Þar er ætlunin að fara yfir stöðu þekkingar á hugsanlegum tengslum brjóstapúða við ALCL og gefa álit á málinu. Þar til ályktun af fundinum liggur fyrir mælir ANSM með því að brjóstapúðar með slétt yfirborð séu notaðir. 

Erfitt er að meta tengsl milli brjóstapúða og ALCL vegna þess hve krabbameinið er fátítt og skráningum á notkun og tegundum brjóstapúða er ábótavant. Almennt eru um 85-90% allra brjóstapúða með hrjúft yfirborð. Krabbameinsfélagið hefur ekki getað fengið upplýsingar um hvaða tegund púða er mest notuð á Íslandi.

Félagið fylgist með rannsóknum og ályktunum um hugsanleg tengsl brjóstapúða og krabbameins. Það er í samræmi við hlutverk félagsins að vera í fylkingarbrjósti í baráttunni gegn krabbameinum. 

Hafi einhver spurningar eða áhyggjur af umræddu krabbameini, eða öðru er tengist krabbameinum almennt, er bent á að hafa samband við ráðgjafa á Ráðgjafarþjónustu Krabbameinsfélagsins í síma 800-4040 eða með tölvupósti á radgjof@krabb.is.


Fleiri nýjar fréttir

17. okt. 2019 : Þungar áhyggjur af bið eftir brjóstaskoðunum

Á málþinginu „Þú ert ekki ein“ sem haldið var þann 15. október síðastliðinn í tilefni af Bleika mánuðinum, var skorað á framkvæmdastjórn Landspítala og heilbrigðisráðherra að stytta biðtíma eftir sérskoðunum eftir að grunur vaknar um brjóstakrabbamein. 

Lesa meira

11. okt. 2019 : Málþing um brjóstakrabbamein þriðjudaginn 15. október

Málþing um brjóstakrabbamein verður að Skógarhlíð 8 þriðjudaginn 15. október 2019 kl. 17:00-18:30 á vegum Brjóstaheilla – Samhjálpar kvenna, Krabbameinsfélags höfuðborgarsvæðisins og Ráðgjafarþjónustu Krabbameinsfélagsins.

Lesa meira

10. okt. 2019 : Bleika slaufan nánast uppseld og Bleiki dagurinn er á morgun

Örfá eintök eru eftir af Bleiku slaufunni 2019 hjá Krabbameinsfélaginu en mikil eftirspurn hefur verið eftir slaufunni í ár. Enn er þó hægt að fá slaufur hjá einhverjum söluaðilum víða um land.

Lesa meira

30. sep. 2019 : Guðbjörg í Aurum hannar Bleiku slaufuna 2019

Guðbjörg Kristín Ingvarsdóttir, skartgripahönnuður í Aurum Bankastræti er hönnuður Bleiku slaufunnar 2019. Í ár er boðið upp á spennandi nýjung í hönnuninni því í fyrsta sinn er Bleika slaufan hálsmen.

Lesa meira

Var efnið hjálplegt?