Takk þið sem hlupuð til góðs í Reykjavíkurmaraþoni Íslandsbanka 2019
Áheitasöfnun hlaupsins á hlaupastyrkur.is er enn í fullum gangi og verður opin til miðnættis á mánudaginn 26.ágúst. Þegar er búið að slá áheitametið sem sett var í fyrra og eru áheitin komin yfir 160 milljónir.
Reykjavíkurmaraþon Íslandsbanka fór fram í 36. sinn í frábæru hlaupaveðri á laugardaginn. Til þátttöku voru skráðir 14.667 hlauparar á öllum aldri. Þátttökumet var sett í 10 km hlaupinu þar sem 7203 tóku þátt og 3 km skemmtiskokki þar sem 2436 voru skráðir til þátttöku.
Um leið og við þökkum þeim fjölmörgu hlaupurum sem hlupu fyrir félagið óskum við öllum þátttakendum til hamingju með að taka þátt því eins og flestir vita er hreyfing af öllu tagi góð fyrir heilsuna.
Líklega eru færri sem vita að regluleg hreyfing í 30 mínútur á dag getur minnkað líkur á ýmsum tegundum krabbameina svo sem í ristli og endaþarmi, brjóstum og legbol. Rannsóknir sýna að einstaklingar sem hreyfa sig reglulega greinast sjaldnar með krabbamein en þeir sem hreyfa sig lítið sem ekkert.
Starfsfólk Krabbameinsfélagsins í stuði á hvatningarstöð félagsins við Ægissíðu
