Stjórnmálamenn geta breytt heiminum
-
Mynd: Lars Bertelsen
Danski stjórnmálamaðurinn Lars Lökke Rasmussen hefur mikið verið í umræðunni í sambandi við dönsku þingkosningarnar í gær. Sérstaka athygli okkar hjá Krabbameinsfélaginu vakti í gær þegar Lars nefndi hve mikils hann mæti heiðursverðlaun sem danska Krabbameinsfélagið veitti honum og Bent Hansen árið 2018. Þau verðlaun voru sannarlega verðskulduð og veitt fyrir að koma á svokölluðum „kræftpakker“ (sem við viljum kalla Forganginn).
Í stuttu máli eru „kræftpakker“ ferli með verklagi sem tryggir að fólk með krabbamein komist fljótt í viðeigandi meðferð. Í þeim eru m.a. sett inn viðmið um þann tíma sem líða má frá því að grunur vaknar um krabbamein og þar til meðferð hefst. Danska krabbameinsfélagið metur það þannig að innleiðing „kræftpakker“ í Danmörku sé sú stjórnvaldsaðgerð sem hefur leitt til mestra framfara fyrir fólk með krabbamein á síðustu árum en raunin er að lífshorfur fólks með krabbamein í Danmörku hafa batnað hvað mest í heiminum á síðustu árum eftir að Danir höfðu verið eftirbátar annarra Norðurlandaþjóða.
Aðgerðir stjórnvalda skipta máli. Í íslenskri krabbameinsáætlun er m.a. einmitt fjallað um „skilgreint þjónustuferli að lokinni sjúkdómsgreiningu, sem tekur til tímabils greiningar, meðferðar, eftirlits og langtímaeftirlits“. Hér eru mikil sóknarfæri fyrir Ísland.
