Stjórnmálaflokkar heimsóttu Krabbameinsfélagið
Fulltrúar stjórnmálaflokka sem eiga sæti á Alþingi þáðu boð Krabbameinsfélagsins um kynningarfund á helstu baráttumálum félagsins á komandi árum. Góður rómur var gerður að fundinum þar sem fjölmargir þingmenn hittust í fyrsta sinn eftir sólríkt sumarfrí.
Það var afar góð stemning hjá Krabbameinsfélaginu föstudaginn 13. ágúst. Fulltrúar íslenskra stjórnmálaflokka hittust þar og þáðu heimboð og kynningu á helstu baráttumálum Krabbameinsfélagsins fyrir komandi alþingiskosningar. Flestir gestir höfðu ekki átt mikil samskipti yfir sumarið á meðan Alþingismenn eru í sumarleyfi og má því lýsa andanum í salnum svipuðum og þegar börn mæta að nýju í skóla að hausti. Halla Þorvaldsdóttir, framkvæmdastjóri Krabbameinsfélagsins, hélt tölu og fór yfir ýmsa þætti tengda forvörnum gegn krabbameinum, nauðsyn þess að bæta aðstöðu og mikilvægi þess að tryggja jafnt aðgengi að heilbrigðisþjónustu.
Með öldrun þjóðarinnar og bættri heilsu mun krabbameinstilfellum fjölga mikið í framtíðinni og með bættri greiningu og meðferð fjölgar mjög í hópi þeirra sem eru í eða hafa lokið krabbameinsmeðferð. Sá hópur mun þurfa aukna þjónustu. Málefni á við leghálsskimanir, brjóstaskimanir og ristilskimanir voru rædd og sömuleiðis eitt helsta baráttumál Krabbameinsfélagsins á næstu árum sem er að ný dagdeild fyrir krabbameinssjúklinga verði byggð og komið í gagnið fyrir 2024.
Góður rómur var gerður að fundinum og forvitnilegt að sjá hverjar stefnur stjórnmálaflokkanna verða í heilbrigðismálum og þá sérstaklega með tilliti til krabbameina.
Myndir: Sigurður Möller Sívertsen
