Stigaáskorun Krabbameinsfélagsins - Taktu stigann
Skemmtileg og heilsueflandi áskorun fyrir vinnustaði. Áskorun Krabbameinsfélagsins stóð yfir í tvær vikur í aðdraganda jóla. Skemmst er frá því að segja að þetta skemmtilega stigaátak vakti mikla lukku í starfsmannahópnum og jók til muna stiganotkun starfsmanna.
Skemmtileg og heilsueflandi áskorun fyrir vinnustaði. Þar sem desembermánuður getur verið dálítið strembinn þegar kemur að góðri næringu og heilbrigðum lífsstíl. Veður eru oft válynd sem gerir heilsuræktina, hið minnsta utandyra, oft erfiðari en ella og miklar og mishollar freistandi jólakræsingar eru oft á boðstólum allan jólamánuðinn. Starfsmenn Krabbameinsfélagsins ákváðu að taka æfingaskipulagið föstum tökum og reyna að auka hreyfinguna þrátt fyrir að það sé margt í jólamánuðinum sem jafnvel dragi úr áhuga á hreyfingu. Af því tilefni var Stigaáskorunin sett á fót en hún fólst í því að hvetja starfsmenn til að nota stigann í stað lyftu á milli hæða í húsnæði Krabbameinsfélagsins að Skógarhlíð 8.
Áskorunin stóð yfir í tvær vikur í aðdraganda jóla. Skemmst er frá því að segja að þetta skemmtilega stigaátak vakti mikla lukku í starfsmannahópnum og jók til muna stiganotkun starfsmanna. Starfsmenn gengju samtals 12.735 metra sem samsvarar því að ganga 1,5 upp Mount Everest eða 6 sinnum upp á topp Hvannadalshnjúks hæsta fjalls Íslands. Það má því með sanni segja að starfsmenn Krabbameinfélagsins hafi lagt sitt af mörkum til að halda hreyfingunni sinni inni yfir jólamánuðinn og létta lundina í leiðinni. Auk þess sem regluleg hreyfing dregur úr líkum á krabbameinum.
