Sigriður Sólan Guðlaugsdóttir 19. mar. 2018

Stefnumótun, hagkvæmni og skilvirkni í heilbrigðiskerfinu

Krabbameinsfélag Íslands fagnar umræðu um hagkvæmni og skilvirkni í heilbrigðiskerfinu út frá skýrri stefnumótun, í kjölfar skýrslu Ríkisendurskoðunar; Sjúkratryggingar Íslands sem kaupandi heilbrigðisþjónustu, sem rædd var í fjölmiðlum nýverið.

Krabbameinsfélagið lítur svo á að krabbameinsáætlun sé hluti af slíkri stefnumótun. Félagið ítrekar áskorun til stjórnvalda um halda áfram þeirri vinnu sem hafin var við krabbameinsáætlun og ljúka henni hið fyrsta.

Krabbameinsfélag Íslands (KÍ) er eitt þeirra félaga sem Sjúkratryggingar Íslands (SÍ) hafa gert samning við en SÍ hefur í mörg ár samið við KÍ um skipulagða hópskimun fyrir krabbameini í leghálsi og brjóstum. Í desember síðastliðnum var félagið gagnrýnt fyrir meðhöndlun opinbers fjár og birti í kjölfarið yfirlýsingu þar sem ásökuninni var vísað á bug. Þar var vísað í nýlega úttekt Ríkisendurskoðunar sem ekki skilaði athugasemdum. 

Tekið skal fram að ríkisendurskoðandi vakti athygli félagsins á að orðalag yfirlýsingarinnar hefði mátt misskilja á þann hátt að Ríkisendurskoðun hafi gert úttekt á fjármálum og rekstri félagsins í heild. Rétt er að í úttekt Ríkisendurskoðunar var farið yfir framlög ríkisins til Krabbameinsfélags Íslands vegna skimunar fyrir krabbameini í brjóstum og leghálsi og rekstrar Krabbameinsskrár, skil á starfsemisskýrslum og ársreikningum. Ríkisendurskoðandi veitti félaginu munnlegar upplýsingar um niðurstöðurnar og sendi félagið allar umbeðnar upplýsingar, þar á meðal bókhaldshreyfingar fyrir þær deildir sem ríkisframlagið varðaði árin 2015 og 2016. 

„Krabbameinsáætlun með skilgreindum markmiðum er afar mikilvægur liður í því að ná árangri í baráttunni gegn krabbameinum,” segir Halla Þorvaldsdóttir, framkvæmdastjóri Krabbameinsfélags Íslands; „Félagið hefur kallað eftir því að stjórnvöld fari í þá vinnu til að tryggja sem bestan árangur í þeirri baráttu.“

Í fyrirliggjandi tillögum að Krabbameinsáætlun er meðal annars fjallað um mikilvægi skimunar fyrir krabbameinum til að minnka sjúkdómsbyrði og dánartíðni af völdum þeirra. Skipulagðri skimun er fyrst og fremst ætlað að finna forstig krabbameina eða krabbamein á byrjunarstigi.  

Hægt er að skrifa undir áskorun Krabbameinsfélags Íslands til stjórnvalda hér.


Fleiri nýjar fréttir

14. des. 2018 : Vegna Nóbels­verð­launa í lækna­vísindum: Er öll sagan sögð?

Afar ánægjulegar fréttir bárust nýverið af því að Nóbelsverðlaunin í læknavísindum hefðu verið veitt James P. All­i­son og Tasuku Honjo vegna uppgötvana á gildi ónæmismeðferðar við krabbameinum. Sjálfir hafa þeir sagt að þeir telji að framfarir í meðferð krabbameina verði svo hraðar að árið 2030 verði krabbamein fyrst og fremst krónískir sjúkdómar.

Lesa meira
VON vinkonur

14. des. 2018 : VON vinkonur safna einni milljón fyrir Krabbameinsfélagið

VON krúsir eru hannaðar og framleiddar af fimm vinkonum úr Verslunarskólanum. Þær Anna María, Páldís, Arndís, Elfa og Valgerður fengu þá hugmynd í frumkvöðlaáfanga að framleiða keramikbolla og selja til styrktar Krabbameinsfélaginu. 

Lesa meira

13. des. 2018 : Getur D-vítamín minnkað líkur á krabbameini?

Nú þegar skammdegið er að ná hámarki er ágætt að minna á ráðleggingar Embættis landlæknis um daglega inntöku D-vítamíns, annað hvort í formi lýsis eða D-vítamíntaflna. 

Lesa meira

11. des. 2018 : Notkun ljósabekkja fer enn minnkandi

Ný könnun samstarfshóps um ljósabekkjanotkun á Íslandi leiðir í ljós að verulega hefur dregið úr notkun ljósabekkja á tímabilinu 2004 til dagsins í dag. 

Lesa meira

7. des. 2018 : Aukin þjónusta við krabbameinssjúklinga á LSH

Landspítalinn hefur brugðist einkar vel við ábendingum sem Krabbameinsfélagið kom á framfæri í haust um erfiða reynslu sjúklinga og aðstandenda af komum á bráðamóttöku spítalans. 

Lesa meira

Var efnið hjálplegt?