Spennandi námskeið á vegum Ráðgjafarþjónustunnar í janúar
-
Starfsfólk Ráðgjafarþjónustu Krabbameinsfélagsins (frá vinstri): Sigrún Lillie Magnúsdóttir forstöðukona og hjúkrunarfræðingur, Auður E. Jóhannsdóttir hjúkrunarfræðingur, Lóa Björk Ólafsdóttir hjúkrunarfræðingur, Þorri Snæbjörnsson sálfræðingur, Gunnjóna Una Guðmundsdóttir félagsráðgjafi.
Í janúar býður Ráðgjafarþjónusta Krabbameinsfélagsins upp á spennandi námskeið og fjölbreytta dagskrá!
Í janúar býður Ráðgjafarþjónusta Krabbameinsfélagsins upp á spennandi námskeið og fjölbreytta dagskrá!
MARKMIÐASETNING OG JÁKVÆÐ SÁLFRÆÐI
Miðvikudaginn 10. janúar kl. 13-16
Námskeiðið hefst miðvikudaginn 10. janúar 2018 kl. 13:00-16:00 og ætlað fyrir þá sem greinst hafa með krabbamein og aðstandendur þeirra. Allir þátttakendur fá eintak af MUNUM dagbókinni sem er hönnuð með það að leiðarljósi að hámarka líkur á árangri og efla jákvæða hugsun.
Leiðbeinendur eru Dr. Erla Björnsdóttir sálfræðingur og Hrund Guðbrandsdóttir markaðsfræðingur.
GÓÐVILD Í EIGIN GARÐ OG ANNARRA
Mindful Self-Compassion
Hefst mánudaginn 15. janúar kl. 13:00-15:00. Vikulega í 3 skipti.
Ráðgjafarþjónustan, í samvinnu við Landspítalann, býður upp á námskeið í núvitund með sjálfúð, góðvild í eigin garð. Námskeiðið hefst mánudaginn 15. janúar 2018 kl. 13:00-15:00 og er vikulega í þrjú skipti og ætlað þeim sem greinst hafa með krabbamein. Tilgangur námskeiðsins er að tileinka sér mildi í eigin garð og auka andlega vellíðan. Námskeiðið byggir nær eingöngu á æfingum.
Leiðbeinandi er Brynhildur Scheving Thorsteinsson, klínískur sálfræðingur.
ÁFALLAMIÐAÐ JÓGA
Hefst fimmtudaginn 18. janúar og verður þriðjudaga og fimmtudaga kl. 09:30-10:30, alls átta skipti.
Ráðgjafarþjónustan býður upp á námskeið í áfallamiðuðu jóga (trauma-sensitive yoga) og er ætlað fyrir einstaklinga sem greinst hafa með krabbamein og aðstandendur þeirra. Námskeiðið hentar einstaklingum sem hafa upplifað áföll og lifa með afleiðingum. Farið er rólega í æfingar og þær gerðar á forsendum hvers og eins. Áhersla er á að styrkja tengsl við líkamann og möguleikann á að hafa áhrif í eigin lífi.
Leiðbeinandi er Margrét Gunnarsdóttir jógakennari, sjúkraþjálfari og sálmeðferðarfræðingur MSc.
BESTA GJÖFIN: ÁHRIF HUGLEIÐSLU Á BÖRN OG UNGMENNI
Fimmtudaginn 18. janúar kl. 17:00.
Stefanía Ólafsdóttir, grunnskólakennari og leiðbeinandi í hugleiðsluskólanum Lótushúsi að flytja erindi um bók sína „Undir Heillastjörnu”. Erindið er ætlað foreldrum og forráðamönnum barna. Bókin inniheldur einfaldar hugleiðsluæfingar og heillakort fyrir börn á breiðum aldri. Einnig verður rætt um leiðir til að skapa endurnærandi stundir með fjölskyldunni.
HUGRÆN ATFERLISMEÐFERÐ
Hefst þriðjudaginn 23. janúar kl. 14:00-16:00 og verður vikulega í fjögur skipti.
Ætlað þeim sem greinst hafa með krabbamein og aðstandendum. Tilgangurinn er að vinna gegn tilfinningalegri vanlíðan.
Leiðbeinandi er Gunnjóna Una Guðmundsdóttir félagsráðgjafi.
GOTT ÚTLIT - BETRI LÍÐAN
Þriðjudaginn 30. janúar kl. 10:00-12:00.
Námskeiðið er ætlað konum sem eru í krabbameinsmeðferð. Næstu námskeið 2018 eru:Þriðjudagana 30. janúar, 27. febrúar, 27. mars, og 24. apríl kl. 10:00-12:00.
Sérfræðingur frá Lancome leiðbeinir um förðun, umhirðu húðar o.fl.