Ása Sigríður Þórisdóttir 16. des. 2022

Sparislaufan sló öll met og seldist upp á mettíma

Helga og Orri hjá Orrifinn skartgripum afhentu Krabbameinsfélaginu 6,3 milljónir króna sem söfnuðust með sölu á Sparislaufunni.

Bleika slaufan í ár var hönnuð af Helgu og Orra hjá Orrifinn skartgripum. Bleika slaufan er árlegt átaksverkefni Krabbameinsfélagsins, tileinkað baráttunni gegn krabbameinum hjá konum. Óhætt er að segja að nokkur eftirvænting hafi ríkt eftir slaufunni.

 

Sala á slaufunni gekk afar vel og seldust um 35.500 slaufur og 500 Sparislaufur, en það eru viðhafnarslaufur sem seldar eru í takmörkuðu upplagi. Salan á Sparislaufunni sló öll met í ár og seldust þær upp á mettíma.

Helga og Orri gáfu alla sína vinnu við hönnun og framleiðslu á slaufunni og afhentu Krabbameinsfélaginu 6,3 milljónir króna sem söfnuðust með sölu á Sparislaufunni. „Við erum sannarlega stolt af því að hafa náð að safna þessari upphæð og þar með slá öll fyrri met. Það er mikil viðurkenning fyrir okkur því við vönduðum okkur mikið við að gera nákvæmlega sömu kröfur í hönnun og smíði slaufunnar eins og þegar gerum okkar eigin gripi og það er góð tilfinning að finna að það skilar sér. Við fundum mikinn meðbyr og fólk beið greinilega spennt eftir að sjá gripinn og eignast hann, við erum virkilega þakklát. Þetta var krefjandi en mjög kært verkefni. Það var áskorun að gera slaufuna á sinn hátt, að láta hana virka sem skartgrip sem passar inn í hönnunarheim Orrifinn gripanna. Það var algjör hugljómun þegar hugmyndin fæddist að hanna slaufuna eins og hún væri hluti af Fléttu skartgripalínunni okkar. Sérstaklega vegna þess að fléttan stendur fyrir umhyggju og vináttu sem passar inntaki Bleiku slaufunnar fullkomlega“ segir Helga.

Allur ágóði Bleiku slaufunnar 2022 rennur til fjölbreyttar starfsemi Krabbameinsfélagsins. Fyrir ágóðann getur félagið meðal annars verið til staðar fyrir þá sem greinast með krabbamein og aðstandendur með ókeypis ráðgjöf og stuðning, sinnt öflugu fræðslu- og forvarnarstarfi og fjölbreyttu vísindastarfi.

Bleika slaufan var til sölu í rúmlega 300 verslunum um land allt en Sparislaufan var seld hjá Krabbameinsfélaginu, Orrafinn skartgripum og hjá Meba.

„Krabbameinsfélagið þakkar Helgu og Orra innilega fyrir samstarfið og stuðninginn. Samstarfið var afar ánægjulegt og farsælt og erum við afar hrærð yfir góðum viðbrögðum við slaufunni í ár. Innilegar þakkir kæru hjón, ” segir Árni Reynir Alfredsson, forstöðumaður fjáröflunar- og markaðsmála hjá Krabbameinsfélaginu.

„Við erum afar þakklát fyrir þá miklu velvild og stuðning sem almenningur og fyrirtæki sýna félaginu í Bleiku slaufunni. Staðreyndin er að starfsemi Krabbameinsfélagsins er öll rekin fyrir söfnunarfé, svo þátttaka fólks í Bleiku slaufunni skiptir félagið gríðarlegu máli. Á hverju ári greinast um 900 konur á Íslandi með krabbamein og um síðustu áramót voru á lífi rúmlega 9000 konur sem hafa fengið krabbamein. Þetta varðar okkur öll“ segir Halla Þorvaldsdóttir framkvæmdastjóri félagsins. 


Fleiri nýjar fréttir

16. feb. 2024 : Veruleg ánægja með námskeiðið og hefur fólk ekki látið misgott veður stöðva sig

Göngurnar eru leiddar af leiðsögumönnum frá Ferðafélaginu sem jafnframt fræða um ýmislegt áhugavert sem tengist þeim slóðum sem gengið er um. Rúmlega fjörutíu þátttakendur á námskeiðinu sem mun standa alveg fram í júní.

Lesa meira
2023-j

12. feb. 2024 : Kastað til bata: Konum boðið til veiðiferðar

Opnað hefur verið fyrir umsóknir í verkefnið „Kastað til bata“ sem er endurhæfingarverkefni á vegum Brjóstaheilla - Samhjálpar kvenna, Krabbameinsfélagsins og styrktaraðila, þar sem konum er boðið til veiðiferðar.

Lesa meira

10. feb. 2024 : Fulltrúar Krabbameinsfélagsins á faraldsfæti

Um þessar mundir stendur Krabbameinsfélagið fyrir átaksverkefni sem miðar að því að fjölga í þeim góða hópi Velunnara sem styðja þétt við bakið á félaginu með mánaðarlegum framlögum. Við erum á ferðinni í Hafnarfirði og Mosfellsbæ.

Lesa meira

9. feb. 2024 : Endurskoðaðar ráðleggingar embættis landlæknis um hreyfingu

Embætti landlæknis kynnti endurskoðaðar ráðleggingar um hreyfingu ásamt því að setja lífshlaupið 2024 af stað í samstarfi við Íþrótta- og ólympíusambandi Íslands.

Lesa meira

7. feb. 2024 : Styrkir til Krabbameinsrannsókna

Vísindasjóður Krabbameinsfélagsins óskar eftir umsóknum um styrki úr sjóðnum. Umsóknarfrestur rennur út á miðnætti 4. mars. Markmið sjóðsins er að efla rannsóknir á orsökum krabbameina, forvörnum, meðferð og lífsgæðum sjúklinga. 45 rannsóknarverkefni af fjölbreyttum toga hafa fengið styrki úr sjóðnum frá árinu 2017.

Lesa meira

Var efnið hjálplegt?