Sólarvarnir geta veitt falskt öryggi
Einstaklingar með viðkvæma húð sem brennur auðveldlega þurfa að að huga að fleiri þáttum en sólarvörn til að komast hjá því að sólbrenna. Þetta kemur fram í nýrri rannsókn sem birt er í vísindatímaritinu JAMA.
Rannsóknin náði til rúmlega 28 þúsund manns í Bandaríkjunum og í henni voru 56% þátttakenda með viðkvæma húð (brenna auðveldlega). Þessir einstaklingar voru mun líklegri til að sólbrenna ef þeir notuðu einungis sólarvörn til að verja húðina gegn bruna.
Samkvæmt Alþjóðaheilbrigðismálastofnuninni (WHO) þá er hægt að fyrirbyggja um 80% af tilfellum húðkrabbameins með þvi að forðast að sólargeislar valdi skaða á húðinni. Það er því til mikils að vinna að þekkja hvaða varnir eru nauðsynlegar til að komast hjá húðskemmdum af völdum sólargeisla.
Einnig er mikilvægt að nota fleiri leiðir en bara sólarvörn til að komast hjá bruna eins og að vera sem mest í skugga þegar sólargeislarnir eru sem sterkastir í kringum hádegið eða nota sólhatt/derhúfu og léttan klæðnað ef ekki er hægt að leita skjóls frá sólinni. Eitt af því sem kom fram í rannsókninni var einmitt að einstaklingar með viðkvæma húð notuðu sjaldan fatnað til að verja húðina gegn sólargeislum.
Hér má sjá ítarlegri umfjöllun um rannsóknina hjá Reuters og einnig er fjallað um rannsókna á vefsíðu Harvard.
Fyrir þá sem dvelja í sól yfir sumartímann er mikilvægt að hafa í huga að:
- Takamarka tímann í sólinni meðan geislar hennar eru sem hættulegastir (milli 10 og 16) og vera reglulega í skugga á þeim tíma eða nota fatnað, hatt og sólgleraugu til að hlífa húðinni
- Nota sólarvörn með háum sólarvarnarstuðli á tveggja tíma fresti, eða eftir að hafa verið í sundlaug, sjó eða sturtu
- Passa sérstaklega að fylgja þessum ráðleggingum fyrir börn og tryggja að húð þeirra brenni ekki
Hér er að finna fræðsluefni um sól og útfjólubláa geisla og hér geturðu spreytt þig á skemmtilegu prófi til að kanna þekkingu þína á sólvörnum.