Skimun ein mikilvægasta forvörnin
Krabbameinsfélagið harmar umfjöllun í fjölmiðlum sem ýtir undir hræðslu og vantraust til skimana fyrir legháls- og brjóstakrabbameinum.
Um leið og félagið vottar öllum þeim sem misst hafa ástvin vegna krabbameina samúð, vill það árétta að skimun er hvergi í heiminum 100% forvörn gegn krabbameinum. Hún er engu að síður ein mikilvægasta forvörnin.
Hér á landi deyja árlega rúmlega 600 manns úr krabbameinum. Hvert einasta tilfelli sem hægt er að koma í veg fyrir eða greina á byrjunarstigum skiptir máli. Hvergi má slaka á í baráttunni gegn krabbameinum.
Leitarstöð Krabbameinsfélagsins hefur á að skipa afar hæfu fagfólki sem vinnur að skimunum sem sést á því að Ísland er í hópi þeirra landa sem hafa hvað lægsta dánartíðni af völdum leghálskrabbameins, eða minna en tvö dauðsföll á ári á hverjar 100.000 konur.
Afar mikilvægt er að konur nýti sér boð í skimun eins og landlæknir, Alma Möller, hvatti til í fréttum RÚV nýverið. Félagið tekur undir orð Ölmu og hvetur fjölmiðla og almenning til að stilla viðkvæmri umræðu í hóf. Vakni grunur um að mistök hafi átt sér stað eru þau mál tilkynnt til Embættis landlæknis sem rannsakar alvarleg atvik í heilbrigðiskerfinu.