Skattafrádráttur vegna styrkja til Krabbameinsfélagsins
Nýlega tóku gildi lög um að einstaklingar fái skattafrádrátt vegna styrkja til félaga eins og Krabbameinsfélagsins. Þetta eru stór tímamót sem staðfesta mikilvægi félaga sem starfa að samfélagslegum framförum og treysta á stuðning almennings. Hér getur þú reiknað þína endurgreiðslu.
Nýju lögin eru sambærileg við það sem tíðkast í nágrannalöndum okkar.
Frádráttur er mismunandi eftir skattþrepum en sem dæmi:
- Gæti einstaklingur sem styrkir Krabbameinsfélagið um 2.000 krónur á mánuði eða 24.000 á ári fengið skattaafslátt sem nemur 9.100 krónum.
Þannig greiðir styrktaraðilinn í raun 14.900 krónur en tryggir hins vegar að 24.000 krónur renni til baráttunnar gegn krabbameinum. Ef miðað er við meðallaun (skattþrep 2 = 37,95%) athugaðu þó að tekjuskattshlutfall getur verið mismunandi milli einstaklinga.
Smelltu hér til þess að reikna þína endurgreiðslu.
Nánari upplýsingar má finna á rsk.is en hér að neðan eru allra helstu atriðin:
- Einstaklingur getur fengið skattfrádrátt (lækkun á tekjuskattsskattstofni) allt að 350 þús. krónum á ári, vegna gjafa og framlaga til félaga sem eru á almannaheillaskrá.
- Til þess að einstaklingur fái frádrátt þurfa gjafir/framlög hans á árinu að vera a.m.k. 10 þúsund krónur. Hámarks frádráttur er 350 þúsund krónur. Frádráttur þessi er ekki millifæranlegur hjá hjónum/sambúðarfólki.
- Krabbameinsfélagið sér um að skila upplýsingum um styrki til Skattsins árlega. Frádráttur verður áritaður á framtöl gefenda (reitur 155 á tekjusíðu framtals). Athugið að lögin tóku gildi 1. nóvember og því eru einungis styrkir sem bárust í nóvember og desember sendir til Skattsins að þessu sinni.
Þeir Velunnarar sem kunna að vilja láta félagið njóta góðs af endurgreiðslunni og hækka framlag sitt geta skráð það hér.
Hafðu samband ef þú óskar nánari upplýsinga á velunnari@krabb.is eða í síma 540 1900 .