Sóley Jónsdóttir 22. maí 2017

Sigurvegari “Hættu nú alveg” keppni Mottumars dreginn út

Kristín Magnadóttir hætti að reykja eftir 50 ár 

Í Mottumars í ár var haldin keppnin “Hættu nú alveg” í samstarfi Krabbameinsfélagsins, Krabbameinsfélags Reykjavíkur og Ráðgjafar í reykbindindi (RÍR) þar sem keppt var í tóbaksbindindi. Alls skráðu sig til keppni 60 einstaklingar og meirihlutinn eða 58% náði að verða tóbakslaus á meðan á keppni stóð. 

Við óskum öllum keppendum til hamingju með árangurinn og hvetjum þá sem ekki náðu að verða lausir við tóbak til að gefast ekki upp og reyna áfram þar til markmiðið næst. Sigurvegari keppninnar var dreginn út að lokinni keppni og sú heppna er Kristín Magnadóttir sem nú er hætt að reykja eftir 50 ár. Að sögn Kristínar er aldrei of seint að hætta og finnur hún nú þegar mikinn mun á heilsu sinni.

Kristín fékk afhent vegleg verðlaun sem samstarfsaðilar Krabbameinsfélagsins gáfu til keppninnar. Wow gaf sigurvegaranum flug fyrir tvo til Evrópu, Þyrluþjónustan gaf útsýnisflug fyrir tvo yfir Reykjavík og fjöllin í kring með lendingu á Esjunni, Hótel Rangá gaf gistingu í eina nótt með þriggja rétta kvöldverði og morgunverðarhlaðborði fyrir tvo og Olís/ÓB gaf 50.000 kr. inneign. 

Krabbameinsfélagið þakkar samstarfsaðilum kærlega fyrir dýrmætan stuðning og óskar vinningshafanum innilega til hamingju með betri heilsu og þessi veglegu verðlaun. 

Um keppnina ,,Hættu nú alveg":

  •  Karlar voru í miklum meirihluta keppenda eða 72%.
  • Flestir keppenda notuðu sígarettur eða 47%. Munntóbak notuðu 42%, 18% rafsígarettur og 8% neftóbak. Þó nokkrir notuðu fleiri en eina tegund tóbaks. 
  • Meðalaldur keppenda var 35 ár en elsti keppandinn var 72 ára og sá yngsti 16 ára.
  • Fjórðungur keppenda hefur valið að vera áfram í stuðningi hjá Ráðgjöf í reykbindindi.  


Keppendur gátu skráð sig til að taka þátt og vera í tóbaksbindindi frá 29. mars til 2. maí. Ráðgjafar hjá Ráðgjöf í reykbindindi höfðu samband við keppendur bæði með tölvupóstum og símleiðis. Reynt var að vera í sambandi við keppendur í hverri viku og tókst það að mestu. 

Að keppni lokinni þurftu keppendur að senda inn vottaða staðfestingu á tóbaksleysi sínu á meðan á keppni stóð. Í nokkrum tilvikum náðu keppendur ekki að standast bindindið allan tímann en voru samt tóbakslausir í lok keppni. Þeir keppendur duttu því út úr keppninni þó að þeir væru hættir 2. maí. Margir þáðu áfram stuðning ráðgjafa og fá áframhaldandi stuðning í allt að eitt ár. 


Fleiri nýjar fréttir

1. mar. 2024 : Við erum að kalla þig út, kall!

Við fögnum framförum í greiningu og meðferð en best er auðvitað ef hægt er að koma í veg fyrir krabbamein. Vísindin vísa okkur leiðina og rannsóknir sýna að 30 til 40% krabbameina tengjast lífsstíl. Það þýðir að ýmsar lífsvenjur, t.d. tóbaksnotkun, áfengisneysla, hreyfingarleysi, mataræði og fleiri þættir geta haft áhrif á líkurnar á ákveðnum tegundum krabbameina.

Lesa meira

29. feb. 2024 : Köllum kalla þessa lands út!

Mottumars, árlegt árvekni- og fjáröflunarátak tileinkað krabbameinum hjá körlum hefst í dag. Kallaútkall er yfirskrift átaksins í ár þar sem lögð er áhersla á forvarnargildi hreyfingar. Regluleg hreyfing dregur úr hættunni á krabbameinum, en allt of margir karlmenn hreyfa sig ekki nóg til að njóta þessara verndandi áhrifa. Það þarf ekki nema örfáar mínútur af hreyfingu á dag til að ná fram jákvæðum áhrifum.

Lesa meira

28. feb. 2024 : Upp með sokkana og í Mottumarshlaupið 2024

Komdu með í fyrsta Mottumarshlaup Krabbameinsfélagsins sem haldið verður á hlaupársdeginum 29. febrúar. Við lofum stuði og stemmningu um leið og við hreyfum okkur til stuðnings góðum málstað!

Lesa meira

27. feb. 2024 : Sjöunda árið í röð fær forsetinn fyrsta parið

Forseta Íslands, hr. Guðna Th. Jóhannessyni hefur frá árinu 2018 verið afhent fyrsta parið af Mottumarssokkunum sem seldir eru til styrktar Krabbameinsfélaginu í Mottumars, árlegu árvekni- og fjáröflunarátaki sem tileinkað er krabbameinum hjá körlum. Forsetinn hefur sýnt verkefninu ómetanlegan stuðning í gegnum árin.

Lesa meira

27. feb. 2024 : Mottumarssokkarnir hannaðir af AS WE GROW

Það eru þær Gréta Hlöðversdóttir, Snæfríð Þorsteins og Kamilla Henriau sem eru hugmyndasmiðirnir og hönnuðirnir á bakvið sokkana sem eru einstaklega fallegir. 

Lesa meira

Var efnið hjálplegt?