Samþykkt um fjárframlag send til yfirvalda
Á aðalfundi Krabbameinsfélagsins sem fram fór á Selfossi 29. maí var samþykkt að veita allt að 450 milljónum króna til uppbyggingar nýrrar dagdeildar fyrir krabbameinssjúklinga. Sú samþykkt hefur nú verið send til ráðamanna.
Krabbameinsfélagið sendi á miðvikudag síðastliðinn, 2. júní, samþykkt aðalfundar félagsins um allt að 450 milljóna framlag til uppbyggingar nýrrar dagdeildar til heilbrigðisráðherra, fjármálaráðherra, forstjóra Landspítala, formanni stýrihóps um Nýja Landspítalann sem og aðal- og varamönnum í velferðarnefnd Alþingis.
Uppbygging nýrrar dagdeildar er bráðnauðsynleg en aðstæður fyrir sjúklinga, aðstandendur og starfsfólk er með öllu óviðunandi eins og sakir standa. Fjárframlag Krabbameinsfélagsins er háð því að stjórnvöld leggist á árar með félaginu og setji málið í forgang.
Er það von Krabbameinsfélagsins að vel verði tekið í samþykktina og uppbygging nýrrar dagdeildar geti hafist sem fyrst. Þannig verði hún tekin í notkun eigi síðar en árið 2024.
Samþykktin í heild er svohljóðandi:
Aðalfundur Krabbameinsfélags Íslands, haldinn á 70 ára afmæli félagsins, á Selfossi 29. maí 2021 lýsir yfir þungum áhyggjum af aðstöðuleysi dagdeildar blóð- og krabbameinslækninga á Landspítala. Landspítalinn er í lykilhlutverki varðandi greiningu og meðferð krabbameina hér á landi og flestir sem fá lyfjameðferð við krabbameinum fá hana á dagdeildinni. Deildin er staðsett í elsta hluta Landspítalans í húsnæði sem bæði er allt of lítið og hentar illa fyrir starfsemina.
Ef halda á þeim góða árangri sem náðst hefur hér á landi í baráttunni við krabbamein verður aðstaða til meðferðar fyrir sjúklinga og aðstandendur að vera fyrsta flokks. Til að laða að sérhæft starfsfólk og gera því kleift að sinna sínu starfi á bestan hátt verður aðstaðan að sama skapi að standast samanburð við það sem best gerist erlendis.
Vandinn er brýnn og hann verður að leysa hið fyrsta. Spár benda til 30% aukningar á fjölda krabbameinstilvika á næstu 15 árum. Sífellt betri árangur, þar sem fleiri lifa eftir að hafa greinst með krabbamein kallar einnig á aukið eftirlit og meðferð. Á Landspítala hefur verið unnin hugmynd að lausn til framtíðar, sem er tiltölulega auðvelt að hrinda í framkvæmd.
Aðalfundurinn samþykkir að styðja við Landspítala og heilbrigðisþjónustu á Íslandi með myndarlegum hætti, almenningi til heilla. Stuðningurinn felst í að félagið veiti 350 milljónum af eigin fé auk allt að 100 milljóna úr sérstakri fjáröflun til uppbyggingar nýrrar dagdeildar blóð- og krabbameinslækninga á Landspítalanum.
Stuðningurinn er háður því að stjórnvöld leggist á árar með félaginu og Landspítalanum og setji bygginguna í forgang, þannig að hægt verði að taka nýja deild í notkun árið 2024.
Leysum málið – lausnin er til!
