Reykjavíkurmaraþon nálgast
Undirbúningur er nú að ná hámarki fyrir Reykjavíkurmaraþon Íslandsbanka sem fer fram laugardaginn 18. ágúst 2018.
Þeir sem hlaupa fyrir Krabbameinsfélagið styðja og efla baráttuna gegn krabbameinum þar sem lögð er áhersla á að fækka þeim sem veikjast af krabbameinum, lækka dánartíðni og bæta lífsgæði þeirra sem greinast með krabbamein. Stuðningur almennings og fyrirtækja er grundvöllur þess að félagið geti starfað.
Krabbameinsfélagið verður með bás á sýningunni Fit & Run í Laugardalshöll þar sem hlauparar sækja boli og hlaupanúmer fimmtudaginn 16. ágúst og föstudaginn 17. ágúst. Starfsfólk félagsins mun afhenda þátttakendum hvatningarmiða til að festa á boli - og Mottumarssokka sem gengu af í síðasta Mottumars.
„Um leið og við þökkum hlaupurum stuðninginn, hvetjum við alla til þess að taka þátt á sínum forsendum, hvort sem er með því að hlaupa sjálfir, hvetja hlaupara eða heita á gott málefni. Allt styður þetta á einn eða annan hátt við mikilvægi hreyfingar sem hefur forvarnargildi gegn krabbameinum,“ segir Halla Þorvaldsdóttir, framkvæmdastjóri Krabbameinsfélags Íslands.
Opið hús
Miðvikudaginn 22. ágúst 2018 kl 12:00 býður félagið hlaupurum í heimsókn í Skógarhlíð 8 í Reykjavík þar sem boðið verður upp á fræðslu um starfsemi félagsins og léttar veitingar.
„Þá langar okkur að þakka stuðninginn og kynna starfsemina sem hlaupararnir eru að leggja lið. Við vonumst auðvitað til að sjá sem flesta og hvetjum hlaupara til að taka með sér gest," segir Halla.
Vinsamlegast tilkynnið þátttöku með tölvupósti á markad@krabb.is.
Áfram hlauparar!
