Rannsóknir og skráning krabbameina
Krabbameinsfélagið gegnir mikilvægu hlutverki í því að afla nýrrar þekkingar á sviði forvarna gegn krabbameinum.
Hjá Krabbameinsskránni eru skráð öll krabbamein sem greinast á Íslandi. Í þann grunn eru sótt gögn í ótal rannsóknir, innlendar sem erlendar, sem margar eru birtar í virtum vísindaritum.
Árið 2019 voru til dæmis birtar 27 vísindagreinar í alþjóðlegum vísindaritum í samstarfi við erlenda og innlenda vísindamenn, auk þess sem niðurstöður á ritrýndum greinum voru kynntar á ráðstefnum.
Einn doktorsnemi útskrifaðist með verkefni sem tengdist skránni á árinu, og þrír læknanemar luku BS verkefnum á vegum hennar. Einnig voru fimm íslenskir læknanemar sendir í Norræna sumarskólann í faraldsfræði krabbameina, en skólinn er á vegum Samtaka norrænna krabbameinsskráa.
Framsetning gagna á heimasíðu félagsins hefur verið bætt og þar er hægt að nálgast tölfræði og upplýsingar um krabbamein á Íslandi á aðgengilegan og gagnvirkan hátt