Rannsókn: Hefur þú greinst með krabbamein? Hver er þín reynsla af greiningarferli, meðferð og endurhæfingu?
Krabbameinsfélag Íslands vinnur nú að undirbúningi rannsóknar meðal þeirra sem greinst hafa með krabbamein.
Markmiðið er að finna þá þætti sem helst þarfnast úrbóta. Félagið mun nýta niðurstöðurnar á ýmsa vegu til að vinna að úrbótum og stefnt er að því að rannsóknin verði fastur liður í starfsemi félagsins með það að markmiði að styrkja félagið í málsvarahlutverki sínu.
„Það skiptir okkur hjá Krabbameinsfélaginu miklu máli að vera í góðu sambandi við almenning og við hvetjum þá sem hafa reynslu og/eða skoðanir á því hvað megi betur fara til þess að senda okkur línu. Upplýsingar um það hvernig við getum þjónað þeim sem greinast með krabbamein og aðstandendum þeirra betur eru okkur afar mikilvægar bæði til að bæta okkar þjónustu og hvetja til úrbóta annars staðar. Enda er eitt af okkar hlutverkum einmitt að vinna að hagsmunamálum,“ segir Halla Þorvaldsdóttir, framkvæmdastjóri Krabbameinsfélags Íslands.
Nafnlaust og ekki greinanlegt
Til að auðvelda undirbúning rannsóknarinnar er fólki boðið að senda inn ábendingar um þá þætti sem það telur mikilvægast að spurt sé um í rannsókninni. Hægt er að senda ábendingar í gátt á vef félagsins.
Ábendingarnar eru nafnlausar og engum persónugreinanlegum upplýsingum verður safnað. Félagið áskilur sér allan rétt til að nýta ábendingarnar eins og réttast þykir.