Pabbamein - Tíminn er dýrmætur. Ekki bíða til æviloka
Í tengslum við Feðradaginn, 14. nóvember er Krabbameinsfélagið með mikilvæg skilaboð til feðra: að fara inn á pabbamein.is og kynna sér helstu einkenni krabbameina og fara strax til læknis ef einkenna verður vart.
Tíminn er dýrmætur. Ekki bíða til æviloka
Skilaboðin eru afar þörf og brýn því nýjar niðurstöður úr Áttavitanum, rannsókn Krabbameinsfélagsins meðal fólks sem greindist með krabbamein á árunum 2015 - 2019 sýna að aðeins 35% karla samanborið við 60% kvenna leituðu til læknis innan mánaðar eftir að þeir fóru að finna fyrir einkennum eða óþægindum sem reyndust vera vegna krabbameins. Einn af hverjum sjö körlum (14%) beið lengur en í ár með að leita til læknis frá því þeir fóru að finna fyrir einkennum.
Því fyrr sem krabbamein uppgötvast, því meiri líkur eru á bata. Því er mjög mikilvægt að pabbar þekki einkennin og bregðist strax við þeim.
Á pabbamein.is geta pabbar lesið sér til um einkenni krabbameina, tekið pabbameinsprófið og skráð sig í Karlaklúbb Krabbameinsfélagsins. Félagar í Karlaklúbbnum fá sérstök skilaboð um leiðir til að draga úr hættu á krabbameinum, um helstu einkenni og annað gott og gagnlegt.
Pabbamein.is er vefsvæði í Karlaklefa Krabbameinsfélagsins (karlaklefinn.is) þar sem fjallað er um heilsu, forvarnir, veikindi og reynslu karla tengda krabbameinum.
Þriðji hver karl greinist með krabbamein á ævinni
Árlega greinast 860 karlar með krabbamein og 320 karlar látast af völdum krabbameina (meðaltal). Krabbameinum hjá körlum fjölgar verulega upp úr fimmtugu. Á næstu 15 árum er spáð 28% fjölgun krabbameinstilvika á Íslandi, fyrst og fremst vegna hækkandi aldurs þjóðarinnar.
Eitt merki fyrir hvern karl sem deyr úr krabbameini árlega
Risa bindi, 27 metrar, hefur verið sett á Hús verslunarinnar með 320 merkjum Krabbameinsfélagsins.
Pabbar, er eitthvað öðruvísi en venjulega?
Hér eru möguleg einkenni sem pabbar ættu ekki að láta fram hjá sér fara. Hafðu samt í huga að í mjög mörgum tilvikum eiga einkennin sér aðrar skýringar en krabbamein. Það er öruggast að vera viss.
- Óvenjuleg blæðing, til dæmis frá endaþarmi, blóð í hægðum, þvagi eða hráka
- Þykkildi eða hnútar, til dæmis í pung, nára, handarkrika eða á tungu
- Óútskýrt þyngdartap
- Þrálátur hósti eða hæsi
- Langvarandi kyngingarerfiðleikar
- Sár sem ekki gróa, til dæmis í munni eða á kynfærum
- Breytingar á hægðum eða þvaglátum, til dæmis langvarandi niðurgangur eða hægðatregða, blóð í hægðum, erfiðleikar við að pissa
- Nýir fæðingarblettir eða breytingar á blettum, til dæmis stærð, lögun eða litur
- Langvarandi óþægindi frá meltingarvegi, til dæmis magaverkir eða uppþemba
- Þreyta sem ekki minnkar við hvíld
- Viðvarandi verkir án þess að orsök sé ljós
Nánari upplýsingar má finna á pabbamein.is
