Öflug vinnustofa um endurhæfingu krabbameinsgreindra
Fimmtudaginn 16. maí fór fram vinnustofa um endurhæfingu þeirra sem greinst hafa með krabbamein. Vinnustofan var samstarfsverkefni endurhæfingarteymis Landspítala, Heilsustofnunar í Hveragerði, Krabbameinsfélags Íslands, Krafts, Ljóssins og Reykjalundar.
Vinnustofan var framhald af samstarfsverkefni þessara aðila sem saman skipulögðu ráðstefnuna „Endurhæfing alla leið” sem fram fór í maí 2018.
Tilgangur vinnustofunnar var að tengja saman fólk alls staðar af landinu til að ræða endurhæfingu þeirra sem greinast með krabbamein og leiðir til að styrkja hana enn frekar.
Ríflega 70 þátttakendur tóku þátt í vinnustofunni sem fram fór í húsnæði Krabbameinsfélagsins og var stýrt af starfsmönnum Verkefnastofu Landspítala. Flutt voru erindi og unnið af krafti í nokkrum vinnuhópum.
Niðurstöður vinnustofunnar hafa verið dregnar saman og verður aðgerðaráætlun, byggð á þeim niðurstöðum, kynnt á næstunni.