Birna Þórisdóttir 8. maí 2019

Gerum hreyfingu hluta af daglegu lífi

  • Hjólað í stígvélum

Í dag hófst Hjólað í vinnuna, heilsu- og hvatningarverkefni ÍSÍ. Starfsfólk Krabbameinsfélagsins tekur eins og áður þátt og hvetur alla til þess að gera virkan ferðamáta og hreyfingu hluta af daglegu lífi. Auk þess að bæta almenna líðan minnkar hreyfing líkur á krabbameinum og fleiri langvinnum sjúkdómum. 

Regluleg hreyfing minnkar líkur á krabbameini í ristli og endaþarmi, brjóstum og legbol, en þessi mein eru í hópi algengustu krabbameina á Íslandi.

Sú áhættuminnkun sem regluleg hreyfing gefur er talin tengjast margvíslegum líffræðilegum ferlum í líkamanum. Meðal þeirra eru áhrif á blóðsykurgildi, insúlín og tengd hormón, kynhormón, bólgu- og ónæmisviðbrögð, en öll hafa þessi ferli áhrif á krabbameinsáhættu. Hreyfing minnkar einnig líkurnar á þyngdaraukningu og stuðlar að því að viðhalda hæfilegri líkamsþyngd sem aftur hefur viðbótaráhrif til að draga úr krabbameinsáhættu.

Hvernig hreyfing er ákjósanleg?

Svo lengi sem hún fer ekki út í öfgar er öll hreyfing jákvæð, og því meiri hreyfing, því betra. Æskilegt er að hreyfa sig rösklega, þannig að hjartsláttur og öndun aukist, í að minnsta kosti hálftíma á dag. Auk þess er gott að hreyfa sig oft yfir daginn, þó ekki sé nema stutt í einu, og takmarka kyrrsetu. Það að gera virkan ferðamáta hluta af daglegu lífi, til dæmis með því að hjóla í og úr vinnu eða skóla, getur verið stórt skref í átt að betri heilsu og umhverfisvænni lífsstíl.

Getur aukin hreyfing verið til góðs fyrir þá sem hafa greinst með krabbamein?

Rannsóknir á nokkrum tegundum krabbameina hafa sýnt fram á að hreyfing á meðan krabbameinsmeðferð stendur yfir og eftir að henni er lokið hefur jákvæð áhrif á líkamsstarfsemina og eykur lífsgæði. Auk þess getur hún dregið úr þreytu sem oft gerir vart við sig hjá þeim sem fá krabbamein. Því er þeim sem greinast með krabbamein ráðlagt að hreyfa sig og fylgja almennum leiðbeiningum varðandi hreyfingu eins og hægt er, nema heilbrigðisstarfsfólk ráðleggi annað.

Lestu meira:

· Hreyfing til að draga úr líkum á krabbameini á vef Krabbameinsfélagsins

· Hreyfing til að draga úr líkum á krabbameini á vef World Cancer Research Fund

· Hjólað í vinnuna, verkefni Íþrótta- og Ólympíusambands Íslands

· Ráðleggingar um hreyfingu, bæklingur frá Embætti landlæknis


Fleiri nýjar fréttir

6. sep. 2019 : Kynningarátak um erfðagjafir

Krabbameinsfélagið hefur tekið höndum saman við sex góðgerðarfélög til að vekja athygli almennings á erfðagjöfum. Yfirskrift átaksins er „Gefðu framtíðinni forskot.“

Lesa meira

4. sep. 2019 : Nú komum við saman: Opið hús á Velunnaradaginn 10. september

Þriðjudaginn 10. september verður opið hús fyrir Velunnara Krabbameinsfélagsins, en það eru þeir sem kjósa að styðja við baráttuna gegn krabbameini með mánaðarlegu framlagi. Þannig gera þeir félaginu kleift að efla stöðugt rannsóknir, fræðslu, forvarnir, ráðgjöf og stuðning í þágu þeirra sem greinst hafa með krabbamein og aðstandenda þeirra.

Lesa meira

4. sep. 2019 : Göngum, hjólum eða hlaupum í skólann!

Krabbameinsfélagið tekur fagnandi hinu árlegu átaki ,,Göngum í skólann“, enda er markmið þess að hvetja börn til aukinnar hreyfingar auk þess að fræða þau, foreldra og starfsfólk skóla um ávinninginn sem felst í reglulegri hreyfingu og stuðla almennt að heilbrigðum lífsstíl fyrir alla fjölskylduna. 

Lesa meira

30. ágú. 2019 : Sterk tengsl milli notkunar tíðahvarfahormóna og brjóstakrabbameins

Í dag birtust í vísindaritinu Lancet niðurstöður stórrar fjölþjóðlegar rannsóknar um tengsl milli notkunar tíðarhvarfahormóna og brjóstakrabbameins. Rannsókninni er stýrt af hópi við Oxford háskóla og í henni er meðal annars stuðst við gögn frá Krabbameinsfélaginu.

Lesa meira

26. ágú. 2019 : Snorri Ingimarsson fyrrverandi forstjóri Krabbameinsfélagsins er látinn

Snorri starfaði bæði sem krabbameinslæknir og geðlæknir og var fyrsti forstjóri Krabbameinsfélags Íslands. Hann gengdi því starfi frá árinu 1984 til 1988. Hann lést í Reykjavík þann 14. ágúst síðastliðinn, 71 árs að aldri. 

Lesa meira

Var efnið hjálplegt?