Nýjar áherslur - ný ásýnd
Stjórn Krabbameinsfélagsins hefur ákveðið að breyta merki og ásýnd félagsins til að endurspegla fjölbreytta starfsemi þess.
Merki félagsins er tæplega 70 ára gamalt og var hannað með vísan í heilbrigðisþjónustu og læknisfræði á sínum tíma. Það hefur verið uppfært einu sinni.
„Við stöndum á tímamótum og um leið og við fögnum nýjum tímum sjáum við aukin tækifæri til að sinna fjölbreyttum verkefnum félagsins,“ segir Valgerður Sigurðardóttir, formaður stjórnar Krabbameinsfélagsins.
Að hönnun nýrrar ásýndar félagsins komu auglýsingastofurnar CO+ Iceland og Brandenburg sem hannaði nýtt merki og vann endanlega útlitsvinnu.
Hjartað á réttum stað
Valgerður segir merkið endurspegla margar hliðar starfseminnar. Lesa megi stafina K og F út úr því sem standi fyrir KrabbameinsFélagið og hringformið vísi til þess að félaginu sé ekkert óviðkomandi þegar krabbamein eru annars vegar.
„Og svo höfum við hjartað auðvitað á réttum stað, erum með útbreiddan faðm og í sigurstöðu eða baráttuhug eftir því hvað við á hverju sinni. Við snúum bökum saman, en merkið endurspeglar líka landsfjórðungana og við leggjum mikið upp úr því að vera til staðar fyrir þá sem greinast með krabbamein og aðstandendur þeirra um allt land,“ segir Valgerður.