Nýir sendiherrar gegn krabbameinum á Alþjóðlega krabbameinsdaginn
Krabbameinsfélagið hefur fengið fyrirtæki til liðs við sig semskuldbinda sig til þess að láta til sín taka í baráttunni gegn krabbameinum með því að miðla upplýsingum til starfsmanna og stuðla að heilsusamlegu vinnuumhverfi.
Alþjóðlegi krabbameinsdagurinn er haldinn árlega 4. febrúar. Í ár hefst þriggja ára herferð krabbameinsfélaga um allan heim þar sem fyrirtæki, samfélög og einstaklingar eru hvattir til að sýna stuðning, láta í sér heyra og þrýsta á stjórnvöld um aðgerðir til að fækka krabbameinstilvikum.
Slagorð alþjóðlegu herferðarinnar er: „Ég er... og ég ætla...“ þar sem hverjum fyrir sig gefst færi á að lýsa sinni leið til að vinna gegn krabbameinum.
Einn af hverjum þremur Íslendingum fær krabbamein einhvern tíma á ævinni. Í dag látast 9,6 milljónir manna úr krabbameinum í heiminum á ári hverju og á Íslandi eru krabbamein önnur algengasta dánarorsökin. Árið 2018 létust tæplega 700 manns vegna krabbameina á Íslandi. Hægt væri að koma í veg fyrir að minnsta kosti þriðjung þessara dauðsfalla með auknum forvörnum, þekkingu á einkennum, snemmgreiningu og meðferð.
Fyrirtækin í landinu hafa öfluga rödd í samfélaginu. Þau eru mikilvægur stuðningur við starfsfólk sitt og geta haft jákvæð áhrif á heilsu þess.
Fyrirtækin skuldbinda sig til að láta til sín taka í að minnsta kosti eina viku á ári í tengslum við Alþjóðlega krabbameinsdaginn með því að:
- auka vitund meðal starfsmanna, til dæmis með fyrirlestrum frá forvarnar- og fræðsludeild Krabbameinsfélagsins
- stuðla að heilbrigðu vinnuumhverfi, til dæmis með því að bjóða upp á fjölbreyttan og hollan mat á vinnutíma
- hvetja til hreyfingar meðal starfsmanna, til dæmis til og frá vinnu
- kynningar- og markaðsdeild fyrirtækisins miðli reglulega til starfsmanna og viðskiptavina fræðslumolum um einkenni krabbameina og forvarnir gegn þeim. Krabbameinsfélagið útvegi þær upplýsingar eða leiðbeini með hvar þær er að finna
- gera starfsmönnum kleift að stunda heilsusamlegt líferni til dæmis þeim aðferðum sem lýst hefur verið hér að ofan
Krabbameinsfélagið býður upp á:
- fjölbreytt kynningarefni fyrir heimasíður og samfélagsmiðla sem hægt er að sérsníða að fyrirtækinu
- fjölda fyrirlestra um ýmsar hliðar krabbameina, til dæmis um viðbrögð við því þegar vinnufélagi fær krabbamein og hvaða lífsstílsþættir hafi áhrif á krabbameinsáhættu
- ráðgjöf fyrir þá sem vilja upplýsingar um krabbamein eða stuðning í eigin veikindum eða aðstandenda
- fjölda námskeiða fyrir krabbameinsgreinda og aðstandendur þeirra
Þegar fyrirtæki auðvelda starfsfólki sínu að velja heilbrigða lifnaðarhætti og vera meðvitað um lífsstílsþætti sem eru fyrirbyggjandi gegn krabbameinum, slá þau tvær flugur í einu höggi: styðja við starfsmannahópinn um leið og þau vinna gegn krabbameinum. Aukin þekking hjálpar okkur að vera vakandi fyrir einkennum, taka upplýstar ákvarðanir um heilsu okkar og takast á við ótta og misskilning um krabbamein.
Við hjá Krabbameinsfélagi Íslands vonumst til þess að fá þitt fyrirtæki í lið með okkur í þessu mikilvæga málefni. Hafðu samband með tölvupósti á markad@krabb.is og skráðu þitt fyrirtæki til leiks.