Ný smásjá ígildi eins starfsmanns
Frumurannsóknastofa Krabbameinsfélagsins hefur tekið til notkunar tölvustýrða smásjá sem býður upp á nýja tækni í skoðun á leghálssýnum. Rannsóknarstofan skoðar öll slík sýni sem tekin eru á landinu í þeim tilgangi að skima fyrir leghálskrabbameini.
Nýja tæknin er felst í því að smásjáin skannar hvert sýni og velur 22 hnit, eða GPS punkta út frá ákveðnum algoritma sem búið er að þróa. Starfsmaður rannsóknarstofunnar skoðar svo punktana og ákveður hvort sýnið sé neikvætt eða þurfi frekari skoðun lífeindafræðings eða meinafræðings.
Tækið kom til landsins í byrjun árs og með þessari tækni er skoðunarferli hraðað til muna. Í gegnum nýju vélina fara nú allt að 100 sýni á dag og hún er ígildi starfsmanns í fullu starfi að sögn Þorbjargar Jónsdóttur, deildarstjóra frumurannsóknastofunnar.
Bætt þjónusta felst í auknum hraða
„Þetta er mikill munur fyrir okkur og tækið hjálpar óneitanlega upp á afgreiðslu sýnanna, sérstaklega þegar koma kúfar eins og þegar við fáum sýni send úr hópskoðunum úti á landi. Og með þessu fyrirkomulagi vonumst við til að svartími eftir sýnatöku styttist. Þannig bætum við þjónustuna á sama tíma og skilvirkni eykst,“ segir Þorbjörg.
Öll starfsemi Krabbameinsfélagins byggir á fjárframlögum einstaklinga og fyrirtækja. Velunnarar félagsins, viðskiptavinir netverslunar og aðrir stuðningsaðilar sem leggja baráttunni gegn krabbameini lið, gera Krabbameinsfélaginu mögulegt að búa starfseminni besta mögulega tækjakost til að stuðla að fyrsta flokks þjónustu.