Mottumarsherferðin frá 2020 tilnefnd til Lúðursins
Mottumarsherferðin frá 2020, þar sem Laddi hvatti þjóðina til að hreyfa sig með dyggri aðstoð góðra manna, hefur verið tilnefnd til Lúðursins í flokki kvikmyndaðra auglýsinga í flokki samfélagsauglýsinga.
Það var okkar ástkæri Laddi sem var sögumaðurinn í eftirminnilegri auglýsingu Mottumars ársins 2020. Hann notaðist þar við gamlan smell úr eigin ranni, Súperman frá árinu 1983, en í þetta sinn sunginn með nýjum texta sem ætlað var að hreyfa við þjóðinni.
Laddi fór fyrir stjörnum prýddum hópi karla sem kynntu til leiks Heilsuráð Mottumars. Þeir kenndu þjóðinni að drepa í [sígarettunni], minnka [áfengis]sullið, maka sólarvörn, fá sér göngutúr, taka skriðsund, dansa og hreyfa sig á fjölbreyttan hátt, borða rétt, drekka vatn, sofa vel, tékka á sér [vera vakandi fyrir breytingum á líkamanum] og klóra sér í pungnum [þreifa eftir hnút í eista]. Þetta eru helstu þættirnir sem geta komið í veg fyrir 30-50% krabbameina og gert það að verkum að krabbamein greinist snemma og hefur hvað bestar horfur.
Það var Brandenburg sem sá um framleiðslu auglýsingarinnar og herferðarinnar en samstarf stofunnar við Krabbameinsfélagsins hefur reynst einstaklega árangursríkt. Hafa Mottumarsherferðirnar hlotið alls sex Lúðra á síðustu sex árum og hafa þær frá því að fyrstu herferðinni var hleypt af stokkunum árið 2011 alls hlotið 20 tilnefningar til Lúðursins!
Nú er að krossa putta og vona að sjöundi Lúðurinn detti í hús í Skógarhlíðina.
https://www.youtube.com/watch?v=hGZ-wLVGUec