Mottumars er farinn af stað!
Þótt febrúar sé enn í andarslitunum var Mottumars settur með formlegum hætti í dag. Fulltrúar Landhelgisgæslunnar og Slökkviliðs höfuðborgarsvæðisins þáðu þá skeggsnyrtingu frá Herramönnum.
Árveknisátak Krabbameinsfélagsins um krabbamein í körlum, Mottumars, var keyrt formlega í gang föstudaginn 26. febrúar kl. 13 í húsakynnum Slökkviliðsins í Skógarhlíð 14. Þar þáðu fulltrúar Slökkviliðsins og Landhelgisgæslunnar skeggsnyrtingu frá rakarastofunni Herramönnum í Kópavogi. Þessir sömu fulltrúar tóku sig vægast sagt glæsilega út að snyrtingunni lokinni, eins og sjá má á þessum myndum.
Þeir Einar Ingi Reynisson og Snorri Hrafnkelsson voru fulltrúar Landhelgisgæslunnar og voru stórglæsilegir. (MYND: Sigurður Ólafur Sigurðsson).
Mottumars hefur farið fram óslitið frá árinu 2011 og er átakinu ætlað að safna fé til rannsókna á krabbameinum í körlum, til ráðgjafar og stuðnings þeim sem greinast með krabbamein og aðstandenda þeirra og forvarna gegn krabbameinum. Með því safna mottu sýna karlmenn hver öðrum stuðning og samstöðu í verki, en yfirskrift átaksins er einmitt „einn fyrir alla og allir fyrir einn.“
Á hverju ári greinast hátt í 900 karlmenn með krabbamein og um 320 látast af völdum krabbameina. Til að setja það í samhengi má benda á að á Ísafirði búa í heild sinni um 900 fullorðnir karlmenn.
Þó er rétt að benda á að yfir 7100 karlar sem hafa greinst með krabbamein eru enn á lífi en lífhorfur hafa batnað mikið á undanförnum áratugum. Um 26% karla sem greindust með krabbamein fyrir 40 árum lifðu í fimm ár eða lengur eftir greiningu en nú geta 68% vænst þess að lifa svo lengi eða lengur.
Birkir Ágústsson, Freysteinn Oddsson og Jón Kristinn Valsson voru á heimavelli í dag. Kvenkyns fulltrúar Krabbameinsfélagsins sögðust hafa „kiknað í hnjánum“ þegar þeir stóðu upp úr rakarastólnum. (MYND: Sigurður Ólafur Sigurðsson).
Við hvetjum alla landsmenn til að fara á www.mottumars.is og skrá sig til leiks, eða styðja við einhvern af fjölda þátttakenda sem safna nú mottu - og safna um leið fé til rannsókna á krabbameinum, fyrir fræðslu og forvarnarstarfsmi gegn krabbameinum, og til ráðgjafar-og stuðningsþjónustu fyrir karlmenn sem greinast, sem og aðstandendur þeirra.
