Stenst hjónabandið mottumissinn?
Jón Steinar Gunnlaugsson, fyrrverandi hæstaréttardómari og lögmaður, hefur tekið áskorun vina og ættingja um að raka af sér 50 ára gamalt yfirvaraskegg ef meira en ein milljón safnast til styrktar Mottumars.
Jón Steinar er líklega flestum kunnur og hann skartar áreiðanlega einni rótgrónustu mottu sem íslenska þjóðin þekkir. Mottuna hefur hann borið sleitulaust frá árinu 1969 og hún fagnar því 50 ára afmæli um þessar mundir.
Jón Steinar þekkir á eigin skinni að missa einhvern úr krabbameini, en bróðir hans lést fyrir aldur fram árið 2002 eftir illvíga baráttu við krabbamein í heila. Hann telur því afar mikilvægt að vel sé hlúð að sjúklingum og aðstandendum.
„Hingað til hef ég ekki hætt á að raka yfirvaraskeggið af þar sem mín heittelskaða, Kristín Pálsdóttir, heillaðist af mottunni á sínum tíma og hefur aldrei séð mig án hennar. Ég tek auðvitað ákveðna áhættu á að missa hana frá mér ef henni líkar alls ekki við mig mottulausan,“ segir Jón Steinar.
Þura Garðarsdóttir, tengdadóttir Jóns Steinars, fer fyrir stuðningshópnum og segist vona innilega að sem mest safnist: „Þessi hugmynd kom upp hjá okkur í barnaafmæli í byrjun mánaðarins og hann tók henni bara vel.“
Náist markmiðið verður mottan rökuð af við hátíðlega athöfn í rakarastól Kormáks og Skjaldar á Laugavegi 59 sunnudaginn 31. mars: „Vonandi stendur hjónabandið á styrkari stoðum en að það standi og falli með einni milljón króna mottu,“ segir Jón Steinar að lokum.
Þeir sem vilja leggja Mottumars lið og sjá Jón Steinar skegglausan geta lagt inn á reikning Krabbameinsfélagsins nr. 0301-26-005035, kt. 700169-2789.
Hér að neðan má sjá myndir af Jóni Steinar og mottunni góðu frá ýmsum æviskeiðum: