Sigriður Sólan Guðlaugsdóttir 27. maí 2019

Mikilvægur stuðningur að lífshlaupi loknu

Í gegnum árin hefur Krabbameinsfélagið hlotið erfðagjafir frá einstaklingum sem kjósa að láta hluta af eigum sínum renna til félagsins eftir sinn dag. Ástæðurnar eru af ýmsum toga, en oftast er það vegna persónulegrar reynslu og stuðnings við málstað félagsins eða til minningar um ástvin.

Erfðagjafir hafa skipt Krabbameinsfélagið miklu máli. Með þeim hefur félagið geta tekist á við ýmis brýn verkefni sem eru til hagsbóta fyrir krabbameinssjúklinga og aðstandendur þeirra.

Vísindasjóður Krabbameinsfélags Íslands var sem dæmi stofnaður að hluta með fjármagni úr tveimur minningarsjóðum. Sjóðurinn styður árlega vísindarannsóknir sem snúa að orsökum krabbameina, forvörnum, meðferð og lífsgæðum sjúklinga. Í byrjun mánaðarins var þriðja úthlutun úr sjóðnum og hlutu 12 vísindamenn styrki upp á samanlagt 60 milljónir.

Erfðagjafir hafa einnig stutt við Ráðgjafarþjónustu félagsins sem veitir ráðgjöf og stuðning fyrir krabbameinssjúklinga og aðstandendur þeirra þeim að kostnaðarlausu.

Íbúðir sem félagið rekur á Rauðarárstíg hafa notið góðs af erfðagjöfum, en þær eru til afnota fyrir krabbameinssjúklinga á landsbyggðinni sem þurfa að sækja meðferð eða rannsókn til Reykjavíkur. Íbúðirnar eru í göngufæri við Landspítalann og létta mjög á tímabundinni húsnæðisþörf þessa hóps.

„Það er með miklu þakklæti, hlýhug og auðmýkt sem Krabbameinsfélagið veitir erfðagjöfum móttöku. Margir þeirra sem ákveða að gefa erfðagjöf hafa stutt félagið reglulega með ýmsum hætti í gegnum lífið og taka auk þess þá stóru ákvörðun að láta enn frekar gott af sér leiða eftir sinn dag. Fyrir þetta erum við óendanlega þakklát og við leggjum metnað í að nýta hverja krónu til hins ýtrasta í baráttunni gegn krabbameinum,“ segir Halla Þorvaldsdóttir, framkvæmdastjóri Krabbameinsfélagsins.

Nánari upplýsingar um erfðagjafir er að finna hér.


Fleiri nýjar fréttir

16. apr. 2024 : Krabba­meins­skráning á Íslandi í 70 ár - Afmælis­málþing

Í tilefni af 70 ára afmæli krabbameinsskráningar á Íslandi býður Krabbameinsfélagið til afmælismálþings.

Lesa meira

16. apr. 2024 : Með þínum stuðningi getum við gert svo ótal margt!

Krabbameinsfélagið þakkar öllum þeim fjölmörgu sem lögðu félaginu lið í Mottumars, árverkni- og fjáröflunarátaki félagsins, í ár. Við erum hrærð yfir þeirri velvild, samkennd og hlýju sem við fundum svo vel fyrir. Öll starfsemi félagsins er rekin fyrir sjálfsaflafé og því er stuðningur almennings og fyrirtækja forsenda fyrir starfinu.

Lesa meira

12. apr. 2024 : Saga Ómars Einarssonar

Ómar fékk krabbamein í háls, árið 2008, á sama tíma og Geir H. Haarde blessaði Ísland. Hann var geislaður í upphafi og síðar skorinn. Í framhaldinu var honum bent á að hitta Ragnar Davíðsson, formann félagsins Ný rödd, sem er eitt af aðildarfélögum Krabbameinsfélagsins. Ragnar hafi hjálpað sér og öðrum mikið.

Lesa meira

8. apr. 2024 : Frábær þátttaka í Skegg­keppni Mottu­mars 2024

Þátttakendur í Skeggkeppni Krabbameinsfélagsins þetta árið voru 360 talsins og alls söfnuðust rétt rúmlega 7,3 milljónir króna. Krabbameinsfélagið þakkar öllum þeim sem tóku þátt og öllum sem styrktu.

Lesa meira

25. mar. 2024 : Saga Sigurgeirs Líndal Ingólfssonar

Sigurgeir segir að fræðslan og kynningin í kringum Mottumars sé þýðingarmikil og hafi ýtt við honum þegar einkenni gerðu vart við sig og gert það að verkum að hann fór til læknis. Einkennin voru ekki ólík þvagfærasýkingu en það var einmitt svarið sem hann fékk fyrst þegar hann leitaði sér hjálpar.

Lesa meira

Var efnið hjálplegt?