Mataræði skiptir máli - Afrískur tagine-réttur frá bæjarstjóranum
Lambatagine er í miklu uppáhaldi hjá Ásthildi Sturludóttur og fjölskyldu hennar. Hún hefur orðið fyrir miklum áhrifum frá frænku sinni sem býr í Frakklandi, en þangað kom rétturinn upphaflega frá Norður-Afríku.
Ásthildur Sturludóttir er bæjarstjóri Akureyrarbæjar og einnig mikill matgæðingur. Hún hefur gaman að því að borða góðan mat en ekki síður hefur hún gaman að því að elda hann sjálf. Foreldrar hennar eru bæði alin upp á landsbyggðinni þar sem áhersla var lögð á að nýta það sem til var í búrinu og bera virðingu fyrir þeim hráefnum sem landið hefur upp á að bjóða. Þess má til gamans geta að móðirsystir Ásthildar, Sigríður Gunnarsdóttir, hefur einnig látið okkur uppskrift í té - en Sigríður hefur haft mikil áhrif á systkinabörn í sinni fjölskyldu sem hafa öðlast afar franska bragðlauka og franska eldhústakta eftir góðar ábendingar frá henni.
Lamba tagine með apríkósum og sveskjum
2-3 msk ólífuolía
2 msk möndlur (án hýðis)
2 rauðir lauka, hakkaðir
3 hvítlauksgeirar
Engifer, eins og þumall að stærð, afhýddur og rifinn.
Saffran
2 kanilstangir
2 tsk kóríander fræ, steytt
500 gr lambagúllas
12 sveskjur, settar í vatn í klukkutíma.
6 apríkósur (má vera meira), settar í vatn í klukkutíma.
3-4 lengjur af appelsínuberki, skornar í lengur
2 msk hunang
Vatn
Búnt af kóríander, saxað
Settu nú olíu í þykkbotna pott og skelltu möndlunum út og steiktu þar til þær eru orðar létt gylltar. Bættu svo við lauknum og hvítlauknum og steiktu þar til þeir eru orðnir sveittir. Bættu svo við engifer, saffraninu, kanilstöngunum og koríanderfræjunum. Bættu svo við lambinu og steiktu þetta í ca. 2 mínútur. Nú máttu hella vatni yfir kjötið, nógu miklu þannig að það fljóti yfir og náðu upp suðu. Láttu sjóða í ca klst. Nú máttu bæta ávöxtunum og appelsínuberki og sjóða áfram í ca kortér. Passaðu að hafa nægt vatn en ekki of mikið. Þegar allt er orðið passlega þykkt má dreifa yfir söxuðu kóríander eða öðrum ferskum kryddjurtum sem eru við hendina. Berðu svo fram strax með pítu brauði og kúskús og granateplasósu.
Granateplasósa (best að gera fyrst)
500 gr af grískri jógúrt
1 stór shallot laukur
1 bolli af granateplafræjum
1 agúrka, kjarnhreinsuð og smátt söxuð
1 bollti pistasíuhnetur, hakkaðar
Eitt búnt af mintu (blöðin plokkuð af og hökkuð gróflega)
Olía
Blandið öllu saman og kælið í klst.
Bon appetit! Þessi réttur er sérstaklega góður til að hafa um helgar þegar tíminn er nægur til að láta hann malla á eldavélinni á meðan fjölskyldunni, og helst gestum, er sinnt. Svo eru afgangarnir jafn góðir ef ekki betri daginn eftir!
Ásthildur Sturludóttir hefur verið bæjarstjóri á Akureyri frá árinu 2018.
