Maraþon 2021: „Ég hleyp af því ég get það”
Þátttakendur í Reykjavíkurmaraþoni láta gott af sér leiða og safna fé til góðgerðarmála. Einkunarorð Krabbameinsfélagsins í hlaupinu, „Ég hleyp af því ég get það”, eru fengin að láni frá Gunnari Ármanssyni sem safnaði fyrst áheitum fyrir félagið árið 2011.
Þá hljóp Gunnar fimm maraþonhlaup til að fagna því að fimm ár voru liðin frá því hann lauk krabbameinsmeðferð. Þessi einkunarorð hafa orðið mörgum hvatning til að hlaupa fyrir félagið með sömu tilfinningu í brjósti.
Hlaupið fyrir Krabbameinsfélagið og aðildarfélög þess
Hlaupurum í Reykjavíkurmaraþoni Íslandsbanka gefst kostur á að hlaupa til styrktar góðs málefnis. Áheitasöfnunin fer fram á hlaupastyrkur.is og er hægt að velja á milli fjölmargra góðgerðarfélaga. Þeirra á meðal er Krabbameinsfélagið og nokkur aðildarfélög þess og eru hlauparar sem ekki hafa valið sér félag hvattir til að gera það sem fyrst. Í ljósi þess að hlaupinu hefur verið frestað til 18. september gefst enn betri tími til að safna áheitum og láta verulega gott af sér leiða.
„Hleyp til heiðurs pabba”
Meðal þeirra sem hleypur til styrktar Krabbameinsfélaginu í ár er Marinó Eggertsson sem heiðrar um leið minningu föður síns.
„Ég veit fyrir víst að pabbi væri fyrstur að mæta til þess að hvetja mig til dáða og er leitt að geta ekki haft hann hjá mér í þetta sinn. Ég hleyp því fyrir hann og safna áheitum fyrir Krabbameinsfélag Íslands sem vinnur gríðarlega mikilvægt starf í baráttunni við krabbamein", segir Marinó sem hefur þegar safnað 175.000 kr.
