Lífeindafræðinemar við HÍ fengu fimm smásjár að gjöf
Martha Á. Hjálmarsdóttir, námsbrautarstjóri við lífeindafræði í HÍ, veitti smásjánum viðtöku. Þær eiga eftir að koma að góðum notum að hennar sögn.
Á síðasta vinnudegi ársins 2020 tók Martha Á. Hjálmarsdóttir, námsbrautarstjóri í Námsbraut í lífeindafræði við Háskóla Íslands, við fimm smásjám sem notaðar hafa verið við skimun og rannsóknir hjá Leitarstöð og Frumurannsóknarstofu Krabbameinsfélagsins. Þær voru gefnar námsbrautinni nú þegar Leitarstöðin var lögð niður.
Martha sagði við það tækifæri að smásjárnar kæmu sér mjög vel en að gleðin yfir gjöfinni væri tregablandin því með niðurlagningu Leitarstöðvarinnar og Frumurannsóknarstöðvarinnar glataðist mjög mikilvæg þekking sem konur þessa lands þyrftu á að halda.
Hún sagði leitt hve umfjöllun um starfsemina hafi verið óvægin því mjög gott starf hefði verið unnið til fjölda ára og því væri mikilvægt að muna að lífeindafræðingar Leitarstöðvarinnar geta kvatt starfið sitt stoltar og óskaði þeim innilega velfarnaðar.