Kastað til bata í Laxá í Laxárdal
Hin árlega veiðiferð Kastað til bata var haldin norður í landi 7.-9. júní þegar 14 konur lögðu land undir fót og héldu í 2ja daga veiðiferð í Laxá í Laxárdal.
Markmiðið með veiðiferðinni er að veita konum tækifæri til að styrkja sig á líkama og sál eftir meðferð við brjóstakrabbameini með því að æfa fluguköst í fögru umhverfi, njóta samvista við veiðifélaga með svipaða reynslu - og veiða ef heppnin er með. Hreyfingin sem felst í kastinu er styrkjandi fyrir brjóstvöðva sem er afar gott eftir meðferð. Vanir fluguveiðimenn kenna þátttakendum að kasta flugu og tekið er mið af líkamlegri getu þátttakenda.
Árið 2019 fékk var farið í tíundu ferðina og Krabbameinsfélagið fékk í lið með sér starfsmenn Krabbameinsfélags Akureyrar og nágrennis (KAON) þegar farið var á sama stað og þegar fyrsta ferðin var farin árið 2010 í Laxá í Laxárdal.
Styrktaraðilar eru verkefninu afar mikilvægir, en á meðal þeirra eru Stangaveiðifélag Reykjavíkur sem leiðbeinir veiðikonunum með réttu handtökin og Veiðihornið sem útvegar vöðlur og flugur.
„Ferðin í ár sem haldin var í samstarfi við KAON (Krabbameinsfélag Akureyrar og nágrennis) var vel heppnuð að vanda. Það er svo dásamlegt að sjá hvað konurnar eru fljótar að tengjast og deila sínum persónulegu sögum sem næra þær bæði á líkama og sál. Það gerast einhverjir töfrar í þessum dásamlegu aðstæðum,” segir Auður Elísabet Jóhannsdóttir, verkefnastjóri verkefnisins og ráðgjafi hjá Krabbameinsfélaginu; „Og þó umræðurnar snúist stundum um alvarleg málefni er hláturinn aldrei langt undan.“
Hægt verður að sækja um þátttöku í verkefninu fyrir árið 2020 í febrúar. Nánari upplýsingar verða veittar á heimasíðu Krabbameinsfélagsins, krabb.is.