Karlaklefinn tilnefndur til verðlauna á ný
Íslensku vefverðlaunin, uppskeruhátíð vefiðnaðarins á Íslandi, verða haldin á vegum Samtaka vefiðnaðarins (SVEF) þann 26. mars. Karlaklefinn er tilnefndur til verðlauna á ný en hann var valinn samfélagsvefur ársins fyrir ári síðan.
Vefsvæðið Karlaklefinn er fræðsluverkefni á vegum Krabbameinsfélagsins þar sem fjallað er um karla og krabbamein á karllægan hátt. Þar er að finna fræðsluefni af ýmsum toga sem sérstaklega er ætlað karlmönnum.
Karlaklefinn er í stöðugri þróun en nýjasta afurðin sem finna má í klefanum er gagnvirkt fræðsluefni sem aðstoðar karla við að ákveða hvort rétt sé að fara í rannsókn til að leita að vísbendingum um blöðruhálskirtilskrabbamein.
Þessi viðbót við Karlaklefann er tilefni þess að vefsvæðið er nú tilnefnt til verðlauna á ný. Hugsmiðjan er samstarfsaðili Krabbameinsfélagsins í þessu verkefni og annast starfsfólk hennar tæknilega útfærslu vefsvæðisins.
Vefsvæði Krabbameinsfélagsins hafa átt góðu gengi að fagna undanfarin misseri og má sem dæmi nefna að vefur Bleiku slaufunnar var valinn samfélagsvefur ársins árið 2018.
Það vísindafólk sem leggur Karlaklefanum lið er m.a. stutt af Vísindasjóði Krabbameinsfélagsins. Verkefnið nýtur líka dyggilegs stuðnings Velunnara félagsins sem styðja við baráttuna gegn krabbameini með mánaðarlegu framlagi og styrkja þannig rannsóknir, fræðslu og forvarnir og endurgjaldslausa ráðgjöf og stuðing til krabbameinsgreindra og aðstandenda þeirra.
Íslensku vefverðlaunin eru uppskeruhátíð vefiðnaðarins, haldin með það að markmiði að efla hann, verðlauna bestu vefina og hvetja þá sem starfa á þessum vettvangi til dáða.