Ítrekuð ósk eftir afhendingu gagna
Lögmaður Krabbameinsfélagsins hefur að ósk stjórnar félagsins sent Sjúkratryggingum Íslands formlegt erindi þar sem óskað er eftir afhendingu gagna
Sjúkratryggingar Íslands
Maria Heimisdóttir forstjóri
Vínlandsleið 16
113 Reykjavík
Reykjavík, 6. september 2020
Varðar: Þjónustusamning Leitarstöðvar Krabbameinsfélagsins og Sjúkratrygginga Íslands
Eins og Sjúkratryggingum Íslands er kunnugt hefur Krabbameinsfélag Íslands og síðar Leitarstöð Krabbameinsfélags Íslands annast um skipulagða leita að krabbameinum í leghálsi og brjóstum í þeim tilgangi að draga úr sjúkdómum og fækka dauðsföllum af þeirra völdum.
Í framhaldi af viðtali RÚV við Tryggva Björn Stefánsson lækni, fulltrúa Sjúkratrygginga í vinnu við endurskoðun kröfulýsinga, í Kastljósi þann 3. september sl., þar sem fram voru settar mjög alvarlegar fullyrðingar um gæðaeftirlit og gæðaskráningu í leitarstarfi félagsins, hefur starfsemi Leitarstöðvarinnar verið í uppnámi.
Á fundi fyrirsvarsmanna félagsins með starfsfólki stöðvarinnar, nú í morgun, kom fram að starfsmenn telja sig ekki geta sinnt sínum störfum hjá Leitarstöðinni á meðan þessum órökstuddu fullyrðingum fulltrúa Sjúkratrygginga hefur ekki verið svarað af hálfu þeirra sem fengu hann til að vinna að gerð kröfulýsinga vegna krabbameinsleitarinnar á árinu 2017.
Eins og fram hefur komið var hvorki starfsfólki Krabbameinsfélagsins né Leitarstöðvarinnar kunnugt um að efasemdir væru af hálfu Sjúkratrygginga eða ráðuneytisins um getu félagsins til að sinna þeim verkefnum sem því voru falin með þjónustusamningnum.
Hér með er ítrekuð beiðni félagsins frá því í fyrradag og í gær um að Sjúkratryggingar afhendi gögn sem ummælin byggjast á. Í ljósi alvarleika málsins er það krafa félagsins að afhending gagnanna fari fram eigi síðar en á hádegi mánudaginn 7. september.
Leggi Sjúkratryggingar fram gögn sem staðfesta ummælin, er það mat félagsins, að ekki verði hjá því komist að loka starfsemi Leitarstöðvarinnar umsvifalaust.
Geti Sjúkratryggingar ekki afhent gögnin á þessum tímapunkti, lítur Krabbameinsfélagið svo á að þau séu ekki til og að ummæli fulltrúa Sjúkratrygginga um starfsemi félagsins séu staðlausir stafir. Að mati félagsins hefur það þá þýðingu að starfsemi Leitarstöðvarinnar hafi farið fram í samræmi við skyldur samkvæmt þjónustusamningi aðila og að engar forsendur séu til að draga í efa hæfni félagsins og starfsmanna Leitarstöðvarinnar til að sinna þeim skimunarverkefnum sem því ber að annast. Virðingarfyllst,
Fyrir hönd Krabbameinsfélags Íslands ogLeitarstöðvar Krabbameinsfélags Íslands
Afrit:
Embætti landlæknis
Heilbrigðisráðuneytið
