HPV bólusetning í alþjóðlegu bólusetningarvikunni
Síðasta vika aprílmánaðar er tileinkuð bólusetningum (World Immunization Week). Því er ekki úr vegi að minna á gagnsemi HPV bólusetninga, sem er hluti af almennum bólusetningum stúlkna í 7. bekk. Drengir geta einnig haft gagn af bólusetningunni en þá þarf að óska eftir henni og greiða fyrir.
Í meira en 99% tilfella orsakast leghálskrabbamein af HPV-veirum sem smitast á milli einstaklinga með kynlífi. Hérlendis er 12 ára stúlkum boðin bólusetning sem veitir vörn gegn tveimur tegundum HPV-veira, sem saman valda 70% tilfella leghálskrabbameins. Bólusett er í skólum.
Til að bólusetningin veiti sem besta vörn þarf hún að eiga sér stað áður en einstaklingurinn fer að stunda kynlíf. Samt geta konur allt að 45 ára aldri haft gagn af bólusetningu þó að virknin sé minni en ef bólusett er fyrr. Konum er ráðlagt að spyrja heimilislækni hvort bólusetningin gæti gagnast þeim.
Mikilvægt er að konur sem hafa verið bólusettar mæti samt í skipulagða skimun fyrir krabbameini í leghálsi þar sem bólusetningin nær ekki yfir allar HPV-veirur sem valdið geta leghálskrabbameini.
Drengir geta einnig haft gagn af HPV bólusetningu, sem er þó ekki hluti af almennum bólusetningum drengja. HPV-veirur geta valdið krabbameini í getnaðarlim, munni, koki og endaþarmi auk þess að valda kynfæravörtum.
Lesa má meira um HPV bólusetninguna á vef Embættis landlæknis.
Frekari upplýsingar um alþjóðlegu bólusetningavikuna má finna á vefjum Alþjóðaheilbrigðismálastofnunarinnar (WHO) og UNICEF.
